Relativitätstheorii
From Wikipedia, the free encyclopedia
D Relativitätstheorii befasst sich mit dr Struggtur vo Ruum und Zyt aber au mit em Wäse vo dr Gravitation. Sie bestooht us zwey physikalische Theorie, wo massgäbligg vom Albert Einstein gschaffe worde si: us dr spezielle Relativitätstheorii, won er 1905 veröffentliggt het und us dr allgemeine Relativitätstheorii, wo 1916 abgschlosse worde isch. Di spezielli Relativitätstheorii beschrybt s Verhalte vo Ruum und Zyt us dr Sicht vo de Beobachter, wo sich relativ zu-ne-nand bewege, und de Phänomen, wo mit däm verbunde si. Di allgemeini Relativitätstheorii baut uf die spezielli uf und fiehrt d Gravitation uf e Krümmig vo Ruum und Zyt zrugg, wo unter anderem durch die beteiligte Massene verursacht wird.
D Relativitätstheorii het s Verständnis vo Ruum und Zyt revolutioniert und Phänomen ufdeggt, wo sich dr ahschauliche Vorstellig entziehn. Die beträffende Phänomen löhn sich aber mathematisch präzis beschrybe und sin experimentell beschtens bestätigt.
D Relativitätstheorii stellt eini vo de zwei Süüle vom Theoriegebäud vo dr Physik dar. D Vereinigung mit der Quantetheorii, wo die zweiti Süüle repräsentiert, isch bishär nid vollschtändig glunge und zellt zu de gröschte Uuseforderige vo dr physikalische Grundlagefoschig. Beidi Theorie enthalte ihri Vorgänger, di newtonschi Physik, als Gränzfall und erfülle dodermit s sogenannte Korrespondenzprinzip.