اضراب 6 ابريل سنة 2008
From Wikipedia, the free encyclopedia
إضراب 6 ابريل, فى البداية, كانت دعوة إضراب سنة فى مصر يوم 6 ابريل من سنة 2008 ضد الغلاء و الفساد و للتضامن مع اضراب لعمال شركة المحلة, اللى كانو حيضربوا فى اليوم دا. اتحول الاضراب من اضراب عمالى فى المحلة لدعوة لاضراب سنة فى مصر كلها بعد ما اتبنى ناشطين سياسين شباب و مجموعة من المدونين (بلوجرز) الفكرة،اتعرفوا بعد كدا بحركة شباب 6 ابريل, و حركة كفاية. انتشرت فكرة الاضراب بسرعة مش متوقعة عن طريق النت و موقع الفيس بوك Facebook بالخصوص و عن طريق الموبيلات عن طريق الSMS و الاعتماد على نقل الكلام بين الناس و المنشورات و الشعرات اللى كانت موجوده على النت و ساعات كانت بتتعلق فى الشوارع. ابتبنت احزاب فكرة الاضراب و قوى سياسيه مختلفه الفكرة و شجعوها. الاضراب فى المحلة الكبرى اتحول لاعمال شغب, اتعرفت بعد كدا باحداث المحلة و اشتبكات بين الاهالى و البوليس و قوات الامن المركزى و استمرت لمدة يومين, حصلت فيها هجوم على اقسام و مراكز البوليس فى المدينه و تدمير و حرق مبانى و حصلت عمليات نهب بشكل عشوائى و الاشتبكات دى وقعت مجموعة من المصابين و كام واحد من الاهالى ماتوا برصاص الامن. الاضراب دا اللى كان مميز فيه ان مفيش جهة معينه او معروفة هى اللى دعت ليه بس مجرد مجموعة من شباب على موقع فيسبوك Facebook, كانو حاسين انهم لازم يعملوا حاجة لبلدهم و يطالبوا باللى مؤمنين بيه و حقوقهم, و طريقة النشر عن طريق النت, اللى اتحولت دلوقتى لقوة جامدة للمعارضه و لتنظيم المظاهرات و الوقفات الاحتجاجيه.الاضراب دا و الفكرة الجرئيه (الغريبه وقتها) فتحت بوابت الاضرابات و الاعتصمات فى مصر, اللى دلوقتى تقريبا كل يوم فيها اعتصام او اضراب صغير. اتحول يوم 6 ابريل من كل سنة لذكرى للناشطين السياسين الشباب و لاغلب المعارضة و فى كل سنة بتدعوا المعارضه لتنظيم مظاهرات و اعتصمات فى ذكرى الاضراب اللى كان فى سنة 2008, فيه ناس شايفه ان اليوم دا اتحول لرمز سياسى و انه عرف للشعب انه ممكن ينجح و يقف قدام الحاجات اللى مش عاجباهم.