عزيز سوريال عطيه
From Wikipedia, the free encyclopedia
عزيز سوريال عطية ( العايشه ، زفتى ، محافظة الغربيه ، مصر ، 5 يوليه 1898 - 24 سبتمبر 1988 ) مؤرخ مصرى عالمى كبير اتخصص فى فترة العصور الوسطى اشهر المؤرخين المصريين فى العصر الحديث على المستوى العالمى. كان من اللى اسسو جامعة اسكندرية اللى اشتغل فيها استاذ لتاريخ العصور الوسطى فى كلية الاداب. الف كتب تاريخيه مهمه كتيره و ساهم فى اصدار المجلة المصرية التاريخية وهى مجلة قيمه بتصدرها الجمعيه المصريه للدراسات التاريخيه فى القاهره من سنة 1948، و اجتهد لغاية ماحقق حلم اصدار الموسوعه القبطيه و اتعامل مع التاريخ بحياديه و موضوعية و علم و بكده أدى دور المؤرخ والباحث التاريخى الحقيقى فنال احترام العالم وبقى اشهر مؤرخين مصر فى العصر الحديث عالمى و اترجمت كتبه للغات كتيره و بقت مراجع مهمه للباحثين.
| ||||
---|---|---|---|---|
معلومات شخصيه | ||||
الميلاد | 5 يوليه 1898 | |||
الوفاة | 24 سبتمبر 1988 (90 سنة)[1][2] | |||
مواطنه | مصر | |||
الحياه العمليه | ||||
المدرسه الام | جامعة القاهره | |||
المهنه | استاذ جامعه | |||
اللغات المحكيه او المكتوبه | عربى [3] | |||
موظف فى | جامعة القاهره ، وجامعة ميشيجان | |||
تعديل مصدري - تعديل |
اتولد عزيز سوريال سنة 1898 فى قريه صغيره اسمها " العايشه " جنب زفتى فى محافظة الغربيه. و هو عنده سبع سنين عزلت اسرته على الزقازيق و دخل هناك المدرسه الابتدائى و بعد ما خلصها راح القاهره و دخل المدرسه الثانوى و اخد البكالوريا سنة 1914 و دخل كلية الطب و لما قامت ثورة 1919 شارك فيها. ابتدا حياته الوظيفيه بالشغل فى وزارة الزراعه و بعدين قرر انه يعمل امتحان البكالوريا كمان مره و بعد ما نجح دخل مدرسة المعلمين العليا و اتخرج منها بتفوق و اشتغل مدرس لكن فضل يدرس لغاية ما أخد شهادة الماجستير و اتبعت انجلترا فى بعثه لأخد الدكتوراه من جامعة كمبردج.
بعد ما رجع مصر اشتغل استاذ لتاريخ العصور الوسطى فى كلية اداب جامعة اسكندريه، لكن فى سنة 1952 استقال و راح على القاهره و كرس حياته للقرايه و الكتابه و اتطلب منه انه يشارك فى المجلس الملى التابع للكنيسه المصريه و اقترح فى سنة 1953 انشاء معهد لدراسة التراث القبطى فإتأسس " المعهد العالى للدراسات القبطيه " جنب معهد الاثار القبطيه اللى كان اسسه " مريت بطرس غالى ". بعد كده هاجر عزيز سوريال على اوروبا و امريكا و قضى بقية حياته هناك و درس فى جامعات انجلترا و المانيا و امريكا ، و اشتغل استاذ زاير لكرسى الاستاذ هنرى و. لوسى فى كلية اللاهوت فى نيو يورك ، و استقر فى امريكا و اشتغل فى جامعة يوتا من سنة 1959 و انشأ مركز لدراسات الشرق الاوسط بالتعاون مع الباحث التاريخى سامى جبره.