Megalópolis del Noreste
From Wikipedia, the free encyclopedia
La Megalópolis del Noreste, tamién conocida como Boston–Washington corridor o Bos-Wash corridor[1], ye una megalópolis asitiada nel noreste d'Estaos Xuníos. Ye, colos sos 50 millones d'habitantes, la aglomeración más fuertemente urbanizada de los Estaos Xuníos, la segunda de mayor población del país y la de mayor potencia económica del mundu[2]. Allugada na costa del océanu Atlánticu, nel Noreste de los Estaos Xuníos, estiéndese, en direición noreste-suroeste, dende los suburbios septentrionales de la ciudá de Boston hasta los suburbios meridionales de Washington DC, nel norte del estáu de Virxinia[3]. Compriende cinco grandes megaciudaes, Boston, Nueva York, Filadelfia, Baltimore y Washington DC[4], xunto coles sos árees metropolitanes y suburbios. Dellos autores inclúin nucleos urbanos menores asitiaos fuera de les llendes qu'acabamos de definir, como Richmond y Norfolk, en Virxinia, al sur, y Portland, en Maine, al norte[5].
La megalópolis estiéndese, grosso modo, a lo llargo del percorríu d'una parte de la autopista U.S. Route 1. En 2010 vivíen nella más de 50 millones de persones, el 17% de la población estauxunidense, nún área territorial de menos del 2% del total nacional, con una densidá de población de 390 hab/km²[6]. Les proyecciones de población calculen qu'en 2025 la megalópolis ha tener una población de 58,1 millones d'habitantes[5].
El términu foi popularizáu pol xeógrafu francés Jean Gottmann na so obra de 1961 Megalopolis: The Urbanized Northeastern Seaboard of the United States. Esti autor conclúi, nel so estudiu, que les ciudaes de la rexón, magar que tán claramente diferenciaes, tán venceyaes unes con otres per aciu del amiestu de les sos zones suburbanes, adquiriendo con ello delles característiques que la convierten núna única y xigantesca ciudá: una megalópolis.
Nel territoriu d'esta megalópolis alcontramos cientos d'universidaes, ente elles ocho de les diez meyores d'Estaos Xuníos y de les meyores del mundu: Universidá de Harvard, Universidá de Princeton, Universidá de Columbia, Institutu Teunolóxicu de Massachusetts, Universidá de Yale, Universidá Johns Hopkins, Universidá de Georgetown y Universidá de Pennsylvania[7].