അതിവേഗതീവണ്ടികൾ
From Wikipedia, the free encyclopedia
മണിക്കൂറിൽ 200ഉം അതിൽക്കൂടുതലും കിലോമീറ്റർ വേഗതയിൽ ഓടുന്ന തീവണ്ടികളെ അതിവേഗതീവണ്ടികൾ എന്നു പറയുന്നു.[1] ജപ്പാനിലെ ഷിൻകാൻസെൻ, ചൈനയിലെ സി.ആർ.എച്., ഇംഗ്ലണ്ടിലെ ക്ലാസ് 395, സ്പെയിനിലെ ഏവ് തുടങ്ങിയവ ഇക്കൂട്ടത്തിൽ പെടുന്നു.
ഇവയെ ബുള്ളറ്റ് തീവണ്ടികൾ എന്നും പറയാറുണ്ട്. ജപ്പാനിലാണ് ഇത്തരം വണ്ടികൾ ആദ്യമായി പാളത്തിലിറക്കപ്പെട്ടത്. ഈ പദ്ധതിയുടെ പ്രാരംഭകാലത്ത് ജാപ്പാൻ സർക്കാർ അതിനെ ബുള്ളറ്റ് തീവണ്ടികൾ എന്നർത്ഥം വരുന്ന ഒരു ജാപ്പനീസ് പേരിട്ട് വിളിച്ചിരുന്നു. തുടർന്ന് ആഗോളവ്യാപകമായി ബുള്ളറ്റ് തീവണ്ടി എന്ന പേർ ഉപയോഗിക്കാൻ തുടങ്ങി.
ഇന്റർനാഷണൽ യൂണിയൻ ഓഫ് റെയിൽവേയ്സിന്റെ നിബന്ധനകൾ പ്രകാരം 250 കി.മീ./മ യിൽ കൂടുതൽ വേഗത്തിലോടുന്ന വണ്ടികളോ, 200 കി.മീ./മ യിൽ കൂടുതൽ വേഗത്തിലോടാൻ പാകത്തിൽ മെച്ചപ്പെടുത്തിയ റെയിൽപ്പാതകളിൽ ആ വേഗത്തിൽ ഓടുന്ന വണ്ടികളോ ആണ് അതിവേഗതീവണ്ടികളായി കണക്കാക്കപ്പെടുന്നത്[2]