സുരക്ഷിതമല്ലാത്ത ഗർഭഛിദ്രം
From Wikipedia, the free encyclopedia
ആവശ്യമായ വൈദഗ്ധ്യം ഇല്ലാത്ത ആളുകൾ അല്ലെങ്കിൽ മെഡിക്കൽ നിലവാരം ഇല്ലാത്ത ഒരു പരിതസ്ഥിതിയിൽ അല്ലെങ്കിൽ രണ്ടും കൂടിയ സാഹചര്യത്തിൽ ഗർഭം അലസിപ്പിക്കുന്നതാണ് സുരക്ഷിതമല്ലാത്ത ഗർഭഛിദ്രം എന്നതുകൊണ്ട് അർഥമാക്കുന്നത്.[1] സുരക്ഷിതമല്ലാത്ത ഗർഭച്ഛിദ്രം ജീവന് ഭീഷണിയായ ഒരു പ്രക്രിയയാണ്. സ്വയം പ്രേരിതമായ ഗർഭച്ഛിദ്രങ്ങൾ, വൃത്തിഹീനമായ സാഹചര്യങ്ങളിലുള്ള ഗർഭച്ഛിദ്രം, ഗർഭച്ഛിദ്രത്തിന് ശേഷമുള്ള പരിചരണത്തിൽ ഉചിതമായ ശ്രദ്ധ നൽകാത്ത ഒരു മെഡിക്കൽ പ്രാക്ടീഷണർ നടത്തുന്ന ഗർഭച്ഛിദ്രങ്ങൾ എന്നിവ ഇതിൽ ഉൾപ്പെടുന്നു.[2] ഒരു വർഷം ഏകദേശം 25 ദശലക്ഷം സുരക്ഷിതമല്ലാത്ത ഗർഭഛിദ്രങ്ങൾ നടക്കുന്നു. അതിൽ ഭൂരിഭാഗവും വികസ്വര രാജ്യങ്ങളിൽ ആണ് നടക്കുന്നത്.[3]
സുരക്ഷിതമല്ലാത്ത ഗർഭഛിദ്രങ്ങൾ പ്രതിവർഷം 7 ദശലക്ഷം സ്ത്രീകൾക്ക് സങ്കീർണതകൾ ഉണ്ടാക്കുന്നു.[3] ഗർഭാവസ്ഥയിലും പ്രസവസമയത്തും ഉണ്ടാകുന്ന മരണങ്ങളുടെ പ്രധാന കാരണങ്ങളിലൊന്നാണ് സുരക്ഷിതമല്ലാത്ത ഗർഭഛിദ്രങ്ങൾ (ഈ കാലഘട്ടത്തിലെ മരണങ്ങളിൽ ഏകദേശം 5-13%).[3] മിക്ക സുരക്ഷിതമല്ലാത്ത ഗർഭഛിദ്രങ്ങളും സംഭവിക്കുന്നത് ആധുനിക ജനന നിയന്ത്രണ സൗകര്യങ്ങൾ ലഭ്യമല്ലാത്തിടത്ത്,[4] അല്ലെങ്കിൽ മികച്ച പരിശീലനം ലഭിച്ച മെഡിക്കൽ പ്രാക്ടീഷണർമാർ എളുപ്പത്തിൽ ലഭ്യമല്ലാത്തിടത്ത്,[5][6] അല്ലെങ്കിൽ ഗർഭച്ഛിദ്രം നിയമവിരുദ്ധമായയിടത്താണ് സംഭവിക്കുന്നത്.[7] നിയമം മൂലം ഗർഭച്ഛിദ്രം നിയന്ത്രിതമായ സ്ഥലങ്ങളിൽ മരണനിരക്കും മറ്റ് സങ്കീർണതകളും വർദ്ധിക്കുന്നു.[8]