द्रेक प्यासेज
From Wikipedia, the free encyclopedia
द्रेक प्यासेज (Drake Passage) दक्षिण अमेरिकाया केप हर्न, चिली, अर्जेन्टिना, व अन्तार्क्तिकाया साउथ शेतल्यान्द द्विपतेगु दथुइ दूगु समुद्री मार्ग खः। थ्व मार्गं एत्लान्तिक महासागरया दक्षिणपश्चिम भाग (स्कतिया समुद्र) व प्रशान्त महासागरया दक्षिणपूर्व भाग स्वाइ, नापं थ्व मार्ग दक्षिणी महासागर तक थ्यं । थ्व मार्गया नां १६गू शताब्दीया इंग्लिस अन्वेषक सर फ्रान्सिस द्रेकया नामं तःगु खः ।
द्रेक प्यासेजयात हलिंया हे दकले जोखिमपूर्ण लःखःया मार्ग धकाः म्हसीकिगु या। थ्व मार्ग दूगु अक्षांशया लःबाहाःयात छुं नं बँ/भूमिं प्रतिरोध मयाइगुलिं थनया लःया तरङ्ग ४० फिट (१२ मिटर) तक थ्यं। थथे तःजाःगु तरङ्ग छगू हे थासय् मुना च्वनिगुलिं थ्व मार्गयात "समुद्रया दकले बल्लाःगु एकाग्र क्षेत्र" धका नं म्हसीकिगु या।[1]
द्रेक प्यासेज एन्तार्क्तिका आसपासया क्षेत्रया दकले चिब्याःगु मार्ग (चोक प्वाइन्ट) जूगुलिं, थ्व मार्गया अस्तित्वं अन्तार्कतिकाया लःया बहावयात तसकं प्रभाव याइ। थ्व हे कारणं थ्व मार्गं हलिंया महासागरीय बाहाः व हलिंया जलवायुइ तसकं प्रभाव याइ। द्रेक प्यासेजया ब्याथिमेट्रीं हलिंया महासागरीय लःया समिश्रणय् महत्वपूर्ण भूमिका म्हिति।