Georges Dumézil
From Wikipedia, the free encyclopedia
Georges Dumézil es un linguista, comparatista, filològ e academician francés, dels aujòls occitans, nascut lo 4 de març de 1898 a París, vila ont moriguèt l'11 d'octòbre de 1986[1]. Son trabalh sus las societats e las religions indoeuropèas es encara l'objècte de travalhs d'apregondiment e de controvèrsias[2], dobriguèt de perspectivas nòvas per fòrça cercaires en sciéncias umanas.
Avent la mestreja d'una trentena de lengas[3], faguèt un important trabalh d'estudi comparatiu exacte e dirècte dels tèxtes mai ancians de las mitologias e de las religions dels pòbles indoeuropèus. Mostrèt que fòrça d'aqueles recits èran organizats segon d'estructuras narrativas identicas e que los mites exprimits per aqueles recits tradusissián una concepcion de la societat organizada segon tres foncions:
- la foncion del sacrat e de la sobeiranetat;
- la foncion guerrièra;
- la foncion de produccion e de reproduccion.
Aquela organizacion en tres foncions se troba descricha aital dins:
- la mitologia,
- los recits fondators coma aquelas de la Roma antica,
- las institucions socialas coma aquelas del sistèma de las castas en Índia,
- la segmentacion de la societat de Regim Ancian en clergat, noblesa e tèrç Estat.
Dumézil tanben s'interessèt a las lengas e recits tradicionals dels pòbles d'Asia centrala.