ააშ-იშ ვიცე-პრეზიდენტეფიშ ერკებული
From Wikipedia, the free encyclopedia
ამდღარშა ააშ-ს ჯონ ადამსიშე ჯო ბაიდენშა 47 ვიცე-პრეზიდენტი ჸუნდჷ. დუდშე ვიცე-პრეზიდენტო გინმირთუდჷ თი კოჩი, ნამუთ ეშმაგორალეფიშ კოლეგიაშ ხჷმეფს მაჟირა აბანს დეკინენდჷ, მარა 1800 წანაშ ეშაგორუეფი ტომას ჯეფერსონიშ დო აარონ ბურიშე ართმანგი ხჷმეფიშ ეჭოფუაშ გეშა პრეზიდენტიშ მინობა წჷმმარინაფალეფიშ პალატაქ გინოჭყვიდჷ. თეშნერი მუდგარენიშ მუმაალს ეიოჩილითაფარო, ააშ-იშ კონსტიტუციაშ მა-12 ბირგულშა მიშათინუა გემშეღეს. თე მიშათინუათ ამდღარ სისტემაქ გიჭყჷ, სოდეთ ეშმაგორალეფი ვიცე-პრეზიდენტის ზოხო არზენა ხჷმას.[1]
პარტია | ვიცე-პრეზიდენტი |
---|---|
რესპუბლიკელი | 20 |
დემოკრატი | 18 |
დემოკრატ-რესპუბლიკელი | 6 |
ვიგი | 2 |
ფედერალისტი | 1 |
ვაკანტური | 18 |
კონსტიტუციაშ მეჯინათ ვიცე-პრეზიდენტის ჭიჭე ნებეფი უღჷ. მუში თარი ფუნქცია პრეზიდენტიშ პოსტიშ დაკინება რე, პოსტი მოქმედი პრეზიდენტიშ ქმედუუნარობაშ, გინორინაშ, ვარა ღურაშ გეშა გედუდიშულებუდა. თე შარათ 9 ვიცე-პრეზიდენტიქ გინირთჷ პრეზიდენტო. თაშნეშე ვიცე-პრეზიდენტი სენატიშ პრეზიდენტი რე, მარა მუს ხჷმაშ მეჩამაშ ნება ხვალე ხჷმეფიშ შქაშა გორთუალაშ შვანს უღჷ.
ააშ-იშ კონსტიტუციაშ 25-ა მიშათინუაშა პრეზიდენტიშ პოსტიშ გოდუდიშულაფაშ შვანს მუმალ ეშაგორუეფშა ვაკანტური სქიდუდჷ. კონსტიტუციაშ მიშათინუას 16 თეჯგურა მონახვამილაქ იჸუ: 7 ღურაშ, 1 გინორინაშ დო 8 პრეზიდენტიშ პოსტიშ დაკინებაშ გეშა. თე მიშათინუათ ვაკანტურ პოსტის ახალ ვიცე-პრეზიდენტის პრეზიდენტი ორინუანს დო ააშ-იშ კონგრესიშ ჟირხოლო პალატა ანტკიცენს. თეშ მეჯინათ ჟირი პრეზიდენტი რე დუნარინეფუ ჯერალდ ფორდი 1973 წანას დო ნელსონ როკფელერი 1974 წანას.[1]
ამდღარშა ვიცე-პრეზიდენტეფი 21 შტატიშე რდეს: ნიუ-იორკი (11), ინდიანა (5), მასაჩუსეტსი (4), კენტუკი (3) დო ტეხასი (3). ვიცე-პრეზიდენტეფიშ უმეტაშობაქ პოსტი 50-60 წანაშ ასაკის დეკინჷ.