語言類型學
From Wikipedia, the free encyclopedia
語言類型學(粵讀:jyu5 jin4 leoi6 jing4 hok6;英文:linguistic typology)係語言學研究嘅一種,專門按唔同語言嘅結構特徵嚟將語言分類。
是但攞兩隻語言嚟睇,佢哋都可以响好多結構特徵上有異同。舉個實際例子,講音系嘅話,廣東話同標準官話等嘅漢語係屬於聲調語言,會靠音高嚟分辨唔同嘅字詞,例如廣東話嘅
- ding1(可能漢字:丁、叮)同
- ding2(可能漢字:頂、鼎)
前者(簡化講)高音啲,而音高唔同令到兩吓聲係兩隻唔同嘅字詞;相比之下,好似英文同德文等嘅絕大多數印歐語言都冇聲調呢家嘢,唔會靠音高嚟分辨唔同嘅字詞,所以屬非聲調語言;再詳細啲噉睇嘅話,仲可以留意到廣東話有 6 調而標準官話就有 4 調... 呀噉。由上述例子睇得出,語言可以按各種嘅結構特徵嚟分類,而且語言類型學遠遠唔淨只會剖析聲調-好似係音節結構、句子啲元件要點排先後、詞句配列同埋關係子句嘅用法... 等咁多唔同嘅語言特徵,都可以攞嚟幫手將語言分類。
語言類型學成日會掕到比較[歐 1]語言學,但兩者有顯著嘅分別:語言類型學睇重嘅係手上啲語言「而家有乜特徵」,而比較語言學就更加著重剖析手上啲語言「喺歷史上點變過嚟」;一般嚟講,如果兩隻語言起源自同一隻語言,噉佢哋梗會有啲相似;但好似語言接觸(兩隻可能唔同源嘅語言長時間噉接觸而變到似對方)噉嘅現象表明,就算兩隻語言相似,都唔表示佢哋同源[1]。