義勇軍進行曲
民國電影《風雲兒女》嘅主題歌、民國出名嘅軍歌、中華人民共和國嘅國歌 / From Wikipedia, the free encyclopedia
《義勇軍進行曲》係中華人民共和國嘅國歌。1935年由田漢作詞,聶耳作曲,本來係電影《風雲兒女》嘅主題曲,但係中國抗日戰爭嘅時候,呢首歌就好出名。
根據徐悲鴻嘅提議,1949年9月27號中國人民政治協商會議第一屆嘅全體會議就通過咗《關於中華人民共和國國都、紀年、國歌、國旗的決議》,有關嘅內容:「在中華人民共和國的國歌未正式制定前,以《義勇軍進行曲》為國歌」。喺文化大革命嘅時代,田漢因為俾人以為有政治問題,所以《東方紅》變咗做非官方國歌,同時都禁止演唱用田漢作詞嘅《義勇軍進行曲》。但係外交場合就照舊演奏《義勇軍進行曲》。
1978年3月5號中華人民共和國第五屆全國人民代表大會第一次會議就通過咗集體填詞嘅《義勇軍進行曲》做中華人民共和國國歌。1982年12月4號,第五屆全國人民代表大會第五次會議就通過關於中華人民共和國國歌嘅決議,撤銷1978年3月全國人民代表大會通過嘅歌詞,用返田漢作詞、聶耳作曲嘅《義勇軍進行曲》做中華人民共和國國歌。2004年3月14號第十屆全國人民代表大會第二次會議正式將《義勇軍進行曲》作為國歌嘅條文寫入去憲法。(第四章第一百三十六條第二款:「中華人民共和國國歌是《義勇軍進行曲》。」)