Cennino Cennini
From Wikipedia, the free encyclopedia
Dr Cennino Cennini (* um 1370 z Colle di Val d’Elsa, Floränz; † um 1440 z Floränz; au Cennino d'Andrea Cennini) isch en italiänische Mooler gsi. Er isch in dr Dradizioon vom Giotto di Bondone gstande, wo mä as dr Gründer vo dr italiänische Rönessans Moolerei aaluegt. In de Urkunde daucht er 1388 zum erste Mol uf as Mooler vo Freske über s Lääbe vom Häilige Stefan in dr Chille San Lucchese bi Poggibonsi.
Aber er isch as Verfasser vom ene Handbuech über d Moolerei, em Libro dell'arte o trattato della pittura, berüemt worde. Er het s gege 1400 gschriibe und es isch zerst dur Abschrifte verbräitet worde. Es isch s iiflussriichste Leerbuech über d Moolerei im Spootmiddelalter worde. Au hüte het s no riisigi kulturgschichtligi und kunstgschichtligi Bedütig.