Dr elektrisch Bass
From Wikipedia, the free encyclopedia
Dr Elektrisch Bass oder churz E-Bass isch e Zupfinstrumänt, wo mäistens us Holz gmacht isch. Er macht nume e liislige Doon und muess wie die elektrischi Gitarre versterkt wärde. Für das isch en elektromagnetische Doonabnäämer im Instrumänt iibaut, wo d Schwingige vo de Saite in elektrischi Signal umwandlet, wo denn normalerwiis mit eme Versterker hörbar gmacht wärde.
E-Bass | |
---|---|
ängl.: bass guitar, ital.: Basso elettrico, frz.: Guitare basse | |
Klassifikation | Chordofoon Elektrofoon Zupfinstrumänt |
Verwandti Instrumänt | E-Gitarre, Kontrabass, Akustischi Bassgitarre |
Im Geegesatz zum Kontrabass, wo ufrächt vor em Spiiler stoot, hängt dr elektrischi Bass, wo dr Spiiler bim Spiile mäisten stoot drbi, am e Draaggurt über dr Aggsle woogrächt oder im ene Winkel bis öbbe 45° vor em Körper vom Spiiler.
Als Bassinstrumänt läit er im ene Muusigansambel mit sine diefe Frekwänze s akustische Fundamänt. Basslinie, wo mit e-Bäss gspiilt wärde, si tüpisch für vili Muusigrichdige, öbbe Dschääs, Rock, Blues, Country, Pop, Schlager und Danzmuusig.