Die Föderativi Ungarischi Sozialistischi Röötrepublik
From Wikipedia, the free encyclopedia
Die Föderativi Ungarischi Sozialistischi Röötrepublik (ungarisch Magyarországi Szocialista Szövetséges Tanácsköztársaság), mäistens churz as Ungarischi Röötrepublik (ungarisch Magyarországi Tanácsköztársaság), isch am 21. Merz 1919 usgrüeft worde und het bis zum 1. August vo däm Joor bestande. E wichdigi Rolle bi iirer Gründig het dr Schurnalist und Zitigsuusegäber Béla Kun (1886–1938) gspiilt. Er isch au zur füerende Person innerhalb vo dr ungarische Röötregierig ufgstiige. Noch dr Machtübernaam vo de Bolschewiki in Russland im Zuug vo dr Oktoberrevoluzioon 1917 isch Ungarn s zwäite Land uf dr Wält gsi, wo e Süstem vo Rööt het chönne installiert wärde.
Magyarországi Szocialista Szövetséges Tanácsköztársaság | |||||
Föderativi Ungarischi Sozialistischi Röötrepublik | |||||
1919 | |||||
| |||||
Wahlspruch: Világ proletárjai, egyesüljetek! Dütsch: Proletarier aller Länder, vereinigt euch! | |||||
Amtsspraach | Ungarisch | ||||
Hauptstadt | Budapest | ||||
Regierigssischtem | Röötrepublik | ||||
Währig | Ungarischi Chroone | ||||
Gründig | 21. Merz 1919 | ||||
Uflösig | 1. August 1919 | ||||
Nationalhimne | Die Internazionaali | ||||
vo Ungarn kontrolliert vo Ungarn bsetzt (Slowakischi Röötrepublik) vo Rumänie kontrolliert vo Frankriich und Jugoslawie kontrolliert |
Am 25. Juni 1919 isch d Diktatuur vom Proletariat verkündet worde,[1] und druf si Banke, d Groossindustrii, Mietshüüser und Betriib mit mee as 20 Aagstellte verstaatligt worde. Grundbsitz über 100 Joch isch entäignet und in landwirtschaftlige Brodukzioonsgnosseschafte organisiert worde. Öbbe 590 Persone si im Raame vom sogenannte „Roote Terror“ vo Revoluzioonsdribunaal, aber au vo Bardeimilize wie die berüchtigte „Lenin-Buebe“ (ungarisch: Lenin-fiúk) hiigrichtet worde.
Die Ungarischi Röötrepublik isch zämmebroche, wo rumänischi Drubbe im Ungarisch-Rumänische Chrieg d Hauptstadt Budapest bsetzt häi. D Republik isch vom Köönigriich Ungarn under em Riichsverwääser Miklós Horthy abglööst worde. Ehemooligi Funkzionäär, Aahänger und Sümpathisante vom Röötsüsteem, aber au e Hufe Lüt, wo mit nütem öbbis z due gha häi, si zwüschen em Summer 1919 und Ändi 1920 wääred em sogenannte „Wisse Terror“ vom Horty sine Drubbe ermordet worde. Noch Schetzige het dr „wiss“ Gegeterror bis zu 5000 Persoone s Lääbe kostet.