Joan Miró
From Wikipedia, the free encyclopedia
Dr Joan Miró i Ferrà [ʒuˈan miˈɾo i fəˈra] (* 20. April 1893 z Barcelona; † 25. Dezämber 1983 z Palma de Mallorca) isch e katalanische Mooler, Grafiker, Bildhauer und Keramiker gsi. Siini früehje Wärk si uf dr katalanische Volkskunst ufbaut, und si vom Kubismus und Fauvismus beiiflusst worde. Vom Aafang bis zur Middi vo de 1920er Johr isch dr Miró z Baris gsi und d Kunstströmige vom Dadaismus und vom Surrealismus, hai bi ihm e grundlegende Stilwächsel zur Folg gha, won en vo dr Gegeständligkeit wäggfüehrt het. Dr Miró isch e Verdräter vo dr Klassische Modärne und isch mit siine fantasievolle Bildmotiv eine vo de populärste Künstler im 20. Johrhundert. Siini magische Symbol für Mond, Stärn, Vogel, Aug und Frau zele zu de bekanntiste Elimänt vo siiner Kunst. Siis Spootwärk isch verstörend, wie zum Bischbil d Serii Toiles brûlées (Verbrennti Liinwänd) , won e inszenierti Zerstörig gsi isch, e Protest gege d Kommerzialisierig vo dr Kunst und en Usdruck vo siiner Forderig, d „Moolerei z ermorde“. Im öffentlige Ruum schmücke zum Bischbil siini Keramikwänd s UNESCO-Gebäud z Baris und s Wilhelm-Hack-Museum z Ludwigshafe; Monumentalskulpture si under anderem uf Blätz z Barcelona und z Chicago ufgstellt.