S Weströmische Riich
From Wikipedia, the free encyclopedia
S äigentlige Weströmische Riich, au Westrom oder Westriich (Hesperium Imperium), isch im Joor 395 us dr letschte Däilig vom Römische Riich under de bäide Söön vom Kaiser Theodosius I. entstande: Dr elteri Arcadius het z Konstantinopel über „Ostrom“ gherrscht und dr Honorius zerst vo Mailand, denn vo Ravenna us über „Westrom“. Die weströmische Kaiser häi nume no in Usneemefäll in dr Stadt Rom residiert.
S Ändi vom Weströmische Riich isch – je noch Sichtwiis – im August 475 mit dr Verdriibig vom Julius Nepos, em letschte weströmische Kaiser, wo vom oströmische Augustus Zenon anerkennt worden isch, dur dr weströmisch Fäldheer Orestes, im August 476 mit dr Absetzig vom jugendlige Usurpator und Geegekaiser Romulus Augustus (spöttisch „Romulus Augustulus“ gnennt) dur dr weströmisch Generaal Odoaker oder im Joor 480 mit dr Ermordig vom Julius Nepos, wo in d Brovinz Dalmatia gflüchdet isch, sich aber immer no as dr Augustus vo Westrom betrachdet het.