Ciclu sotíaco
From Wikipedia, the free encyclopedia
El ciclu sotíaco (de Sotis, el nome griegu de la diosa exipcia Sopdet, personificación de la estrella Siriu) ye un periodu d'aproximao 1460 años provocáu pola traslación añal de la observación del orto heliaco de Siriu.
Nel Antiguu Exiptu los sacerdotes-astrónomos reparaben tolos años la primer apaición nel horizonte de Siriu pos para ellos señalaba l'empiezu de la dómina de los llenes. Idealmente dichu acontecimientu tendría de coincidir col empiezu del añu exipciu, pero como nel calendariu exipciu tolos años sumaben 365 díes, ensin entrepolar díes adicionales pa compensar la diferencia col añu sidéreo, cada cuatro años el orto de Siriu movíase un día nel calendariu, volviendo coincidir col añu nuevu teóricu solu tres unos 1460 años, ye dicir cuatro años per caúnu de los 365 díes del añu.
Foi nel añu 1904 cuando l'eruditu alemán Eduard Meyer, combinando cálculos astronómicos col estudiu testos exipcios y datos arqueolóxicos, punxo les bases modernes d'un métodu que pretende apurrir confirmación independiente a la cronoloxía del Antiguu Exiptu. Disponiendo de testos fechaos nel añu de reináu de dalgún faraón que documenten observaciones del ascensu de Siriu y conociendo puntos fixos del entamu del ciclu, teóricamente puede asignase una datación absoluta a esos testos y, por tanto al reináu del faraón implicáu. Disponemos de dellos testos d'esti tipu, por casu los papiros de Lahun y el papiru Ebers, que dan feches pa los respeutivos reinaos de Senusret III (dinastía XII) y Amenhoptep I (dinastía XVIII); amás sábese que nel 139 d. C. el orto heliaco coincidió col añu nuevu exipciu, lo cual apurre a los exiptólogos puntos fixos pa los reinaos de dambos faraones.[1]