Home de Cromañón
From Wikipedia, the free encyclopedia
Home de Cromañón ye'l nome col cual suel designase al tipu humanu correspondiente a ciertos fósiles de Homo sapiens, cuantimás los asociaos a les cueves d'Europa nes que s'atoparon pintures rupestres. Suel acastellanase y embrivise la grafía orixinal Cro-Magnon como cromañón, sobremanera pal so usu en plural (cromañones). Cromañón ye la denominación local d'una cueva francesa na que se toparon los fósiles a partir de los que se tipificó el grupu. El so datación (40 000 y 10 000 años d'antigüedá) tómase como'l finxu que da empiezu al Paleolíticu cimeru dende'l puntu de vista antropolóxicu, ente que la llende moderna nun la marca l'apaición de nengún cambéu físicu, sinón ambiental y cultural: el fin de la postrera glaciación y l'empiezu del actual periodu interglaciar (periodu xeolóxicu Holocenu), colos periodos culturales denominaos Mesolíticu y el Neolíticu.
L'usu del conceutu "home de Cromañón" como alternativu a otres denominaciones ta abandonáu polos prehistoriadores y paleontólogos na actualidá, anque puede atopase'l so usu nes publicaciones, de normal como sinónimu de Homo sapiens nel paleolíticu, ensin más precisiones.
Los primeros homes modernos europeos arrexuntaronse hasta apocayá en dos variedaes: la raza de Cro-Magnon, más robusta, y la variedá de Combe Capel, Brno o Predmost, más llivianu. En realidá, esta dicotomía pretendía xustificar el binomiu cultural Auriñaciense-Perigordiense y anguaño abandonóse, tando namái xeneralizáu l'usu del términu cromañones pa los homes modernos paleolíticos. Variedaes más tardíes (home de Grimaldi o de Chancelade) tampoco paecen tener diferencies somátiques que xustifiquen una completa diferenciación poblacional de tipu racial.
Sicasí, mientres enforma tiempu popularizóse la errónea identificación d'esos trés tipos humanos coles trés divisiones raciales o races humanes de l'antropoloxía clásica: Cro-Magnon cola raza blanca o caucasoide, Grimaldi cola raza negra o negroide y Chancelade colos esquimales o raza mariella o mongoloide.[2]