Molière
From Wikipedia, the free encyclopedia
Da Jean-Baptiste Poquelin, bekannt ois Molière (* vamuatli 14. Jenna 1622 z Paris; † 17. Feba 1673 emdo) wor a franzesischa Schauspuia, Theatadirektor und Dramatika. Ea guit ois oana vo de grässdn Moasta vo da Komedie vo oin Zeidn. Seine bekanntasdn Stickl san Le Misanthrope ("Da Menschnfeind"), L'École des Femmes ("De Schui vo de Weiwa"), Tartuffe ou L'Imposteur ("Tartuffe oda Da Betriga"), L'Avare ("Da Geizige"), Le Malade Imaginaire ("Da eibuidte Kranke") und Le Bourgeois Gentilhomme ("Da Biaga ois Edlmo"). Seine Themen worn tippische menschliche Vahoidnsweisn in da Gsejschoft.
Da Molière hod an groussn Einfluss af de franzesische Kuitua ghobt, dea bis heit nochwiakt. An Haffa Weata und Phrasn san in de franzesische Sproch ibanumma worn. A scheinheilig Betriga beispuisweis is bis heit im Franzesischn a "tartuffe".
Da Molière kimmt aus ana reichn Biagafamij und hos bis zum Hofdichda vom Ludwig IVX brocht. Sei Tartuffe is zeidweis vaboudn worn, wei ra in dem Weak de scheinheilign, religiesn Heichla afs Koan gnumma hod und se so in Zoan vo da katholischn Kira zuazogn ghobt hod.