Mährn
From Wikipedia, the free encyclopedia
Mährn (tschechisch/slowakisch: Morava; deitsch: Mähren; poinisch Morawy; lateinisch: Moravia) is a historischs Landl in da Tschechischn Republik und ans vo de drei historischn Behmischn Landln – Behman, Mährn, und Estareichisch- (heit: Mährisch-) Schlesien. Es woar aa ans vo de 17 ehemolign Cisleithanischn Kronlända vo da Estareichisch-Ungarischn Monarchie (1867 - 1918) und vo de fimf Landln vo da Easchtn Tschechoslowakischn Republik (1918 - 1938). Mährn hod 20,000 km2 und ciaka 3 Mülleonan Eihwohna.
Der Artikl is im Dialekt Ostestareichisch gschriem worn. |
Da Naum kummd vo Morava, in Slawischn Wuat fian Fluss Moach, wöchane duatn da Hauptfluss is. De Moach entspringd im eißasdn Noadwestlichn Zipfe vo Mährn und valossd is Landl im eißasdn Sidostn. De gressde Stod und ehemolige historische Hauptstod is Brünn. Vuam dreißgjahrign Kriag woa olladings Oimütz de Haupstod.
Aa wauns in ana Vawoitungsrefuam im 1949a Joa offiziöö obgschoffd wuan is, güüt Mährn in de Kepf vo de Leit oiweu nu ois extrigs Landl und bsundara Laundstrich. De Mähra san bsundasd stuiz af eanare eigane, lokale Identitet und haum a stoaks Sööbstbewusstsein. Es gibd aar a gwisse Rivalitet zwischn eana und dena Behm. Trotz eanan Regionalbewusstsein seng si de slawischn Mähra ois Teu vo da tschechischn Nation, nuar a poa seng si ois komplett aundares Voik.
Innahoib vo de slawischn Mähra san de Hanakn de gressde Voiksgrubbm. Se haum an eiganan Dialekt und aa eigane Trachtn. De Hanakn san im Zentralteu vo Mährn dahaam und götn ois de "klassischn" Mähra. Im Ostn, geng de Slowakei hii san de mährischn Wolochn und de mährischn Slowakn dahaam. De Letzdan Zwaa san da Iwagaung zwischn de Tschechn und de Slowakn. Bis 1945 is vo vü Leit Deitsch gredd wuan, in da Sidhöftn Boarisch. Noch da Vatreiwung anno 1945 is davo owa ned vü iwa. Des friacha stoake jidische Lebm is duachn Holocaust fosd ausgstuam. Kuaz vuam Aussteam san aa de mährischn Krowodn, a neadlicha Ausleifa vo de scho vaschwundanan Moachfödkrowodn.