Queiggaghyn y Pholynn
From Wikipedia, the free encyclopedia
She aarheynn reiragh jeh'n cheim s'yrjey 'sy Pholynn veih'n 14oo eash eh yn queiggey (Polynnish: województwo, focklit magh myr [vɔjɛˈvut͡stfɔ]). Ren lhiassaghyn gurneilys ynnydagh y Pholynn, hie er nyn noltey 'sy vlein 1998 as hie magh er bree er 1 Jerrey Geuree 1999, cur shey queiggaghyn jeig er bun. V'ad currit er bun ayns ynnyd henn wheiggaghyn Phobblaght Heayagh y Pholynn hie magh er nyn groo er 1 Jerrey Souree 1975.
Ta enmyn ny h-ardjyn shenndeeagh as çheer-oaylleeagh currit er ny queiggaghyn noa-emshyragh. Roish y vlein 1998 va enmyn ny preeu-valjyn currit er ny shenn wheiggaghyn.
Ta'n eaghtyrys reiragh er keim ny queiggaghyn rheynnit magh eddyr kiannoort (voivode ny wojewoda y Pholynnish) ta goll er pointeil ec y reiltys ashoonagh, çhionnal reiht (sejmik), as coonseil chiannoortagh ta reiht ec y çhionnal shen. She marszałek województwa (marshyl y wheiggey) yn ennym ta currit er fer ny ben toshee y choonseil chiannoortagh. Ta ny queiggaghyn hene goll er rheynn magh ayns coondaeghyn (powiat) as baljaghtyn (gmina).