Prostitucado che Popul-Republiko Chinia
From Wikipedia, the free encyclopedia
Quik pos obtenar povo en 1949, la Komunista Partiso di Chinia komencis kampanii qui probis removar la prostitucado de la kontinento finante ye frua yari 1960a. Depos la laxigo di la guvernerio pri sociala kustumi dum frua yari 1980a, la prostitucado ne nur ri-aparis en la Popul-Republiko Chinia, ma nun trovesas tra omna urbala e rurala loki. Malgre l'esforci di la guvernerio, prostitucado developis tante multe ke ol nun esas sua propra industrio, kun granda nombro di personi e facante granda ekonomiala produktado. Prostitucado divenabas anke asociita kun grandanombra problemi, inkluzite krimino organizita, guvernala koruptado, e morbi sexuale transmisebla.
Aktiveso en Chinia relatante a prostitucado havas multa tipi, loki, e preci. Vendanti di la sexuo venas de multa rangi di la socio. Li preske omna esas mulieri, tamen recente virala prostituciti aparis. Tipala loki inkluzas hoteli, karaoke-erii e beleso-saloni.
Malgre ke la guvernerio di Chinia omnatempe esis serioza pri ti qui aranjas la krimino di prostitucado, pri la traktado di la prostitucito ipsa ol ulatempe traktas ol kom krimino, ed ulatempe traktas ol kom mala konduto. Depos la ri-aparo di prostitucado dum la yari 1980a, la guvernerio unesme uzis la legala sistemo, to esas, la diala operaciono di la korti e polico. Duesme, li uzis kampanii duktita da la policistaro, kun periodi di intensa publika exameno kom sociala diciplino. Malgre la suporto por legigar la sexuo-industrio da internaciona NGO-i ed exterlandana komenteri, esas preske nula suporto por to de la publiko, sociala organizi, o la guvernerio di Chinia.