Hertogdom Limburg
From Wikipedia, the free encyclopedia
Dit artikel is gesjreve (of begós) in 't Norbiks. Laes hie wie v'r mit de versjillende saorte Limburgs ómgaon.
't Hertogdom Limburg waor èng van de Zaeëvetieën Provinciën van Bourgondië en is oontsjtande bie 't oetèèvalle va Neder-Lotharinge. In 't midde van d'r 11de ieëw waor Frederik ll va Luxemburg hertog va Neder-Lotharinge en voogd van de abdij Stavelot-Malmedy. Haeë zow d'r örsjte graaf va Limburg waeëre en sjtorf in 1056. De erfdochter van Frederik, Judith, trowde mét Udo of Otto dae in 1061 comes de Lemborch geneumd wert. In 1064 boewde e 'n primitief burcht en sjtadsömwalling in Limburg. De later versjterkinge fungeerde neet langer wie bies in d'r 16de ieëw. Bies an d'r Limburgse Successiekrèèg how 't hertogdom de volgende vorste:
- Hendrik l, graaf van Limburg (1082-1119) en hertog van Neder-Lotharinge. D'r hertogstitel dae Hendrik in 1101 verworf, waoërt 'm dör keizer Hendrik V oontnaome ten voordele van Godfried van Leuve-Brabant mae toch bleef d'r graaf van Limburg d'r hertogstitel veure.
- Walram ll, graaf van Limburg (1119-1139) en hertog van Neder-Lotharinge (1128-1139)
- Hendrik ll, graaf van Limburg (1139-1155), daonao hertog van Limburg (1155-1167) bekaand dör z'n huwelèk mèt Mathilde van Saffenberg en daodör de oetbreiding van 't gebied mèt Kloosterrade.
- Hendrik lll, hertog van Limburg en markies van Arlon (1167-1221)
- Walram lll, Hieër va Monschau (1198-1221), graaf van Luxemburg (1214-1226) en hertog van Limburg (1221-1226) bekaand öm z'n graaf in 't middesjip van de abdijkèrk Kloosterrade
- Hendrik lV, graaf van Berg (1226-1247) en hertog van Limburg (1226-1247)
- Walram lV, hertog van Limburg (1247-1280): z'n enig keend, hertogin van Limburg:
- Irmgardis (1283-1283) getrowd mèt Reinald l van Gelre, sjtorf joonk, oeënao Reinald 't laeveslaank vruchgebroek dör d'r Duutsje keizer toegewaeze kreeg. D'r waore mieë gegadigde vör dis erfenis en tösje de eisers oontsjtong d'r Limburgse Successiekrèèg dae besjlecht waoërd mèt d'r Sjlaag bie Woeringe op 5 juni 1288. D'r kreeg wert gewonne dör hertog Jan l van Brabant en verworf op die meneer 't hertogdom Limburg.