Margrethe II van Daenemarke
From Wikipedia, the free encyclopedia
Dit artikel is gesjreve (of begós) in 't Valkebergs. Laes hie wie v'r mit de versjillende saorte Limburgs ómgaon.
Margrethe II (sjpreek oet wie [maˈkʁeˀtə]; gebore es Margrethe Alexandrine Þórhildur Ingrid; 16 april 1940, Amelienborg in door Nazi-Duutsjland bezat Daenemarke) ies de Keuningin van Daenemarke en daomèt 't hoagste sjtaatshouf van de Kèrk van Daenemarke en de Maarsjalk van de Daense Defensie. Margrethe II waor gebore in 't Hoes van Glücksburg, e keuninklik hoes mèt wortele in 't Noord-Duutsje Schleswig-Holstein. Dit Hoes haet ouch de monarchfemilies van Noorwaege en Griekeland veurtgebrach. Margrethe waor 't awste kind van toendertied Keuning Frederick IX van Daenemarke en Ingrid van Zjwede. Zie woort de troanopvolgster van häöre pap in 1953, wie de Daense regiering 'n constitutuioneel amendement aannom woadoor neet per se de awste zoon van 't sjtaatshouf, meh 't awste kind rech haet op de troan. Hiemèt woort 't in de praktiek meugelik um es vrouw de regierende monarch van Daenemarke te weure.
Margrethe nom de kroan euver van häöre pap op 14 jannewarie 1972, wie Frederick XI waor gaon hemele. Bie de troanopvolging woort zie de ièrsjte vrouwelike monarch van Daenmarke saer Margrethe I van Daenemarke, die neet allein keuningin waor van Daenemarke mer de hièrseres van alle Scandinavische keuninkrieke (1375-1412, de Unie van Kalmar). In 1967 trouwde Margrethe II mèt Henri de Laborde de Monpezat, lid vaan de bekènde en welgesjtèlde Franse Laborde de Monpezat-femilie. Mèt Henri kreeg Margrethe II twiè kinger: Kroanprins Frederik van Daenemarke en Prins Joachim van Daenemarke.