എഫ്.സി. ബാഴ്സലോണയുടെ പരിശീലകരുടെ പട്ടിക
From Wikipedia, the free encyclopedia
സ്പെയിനിലെ ബാഴ്സലോണ ആസ്ഥാനമാക്കിയ ഒരു പ്രൊഫഷണൽ ഫുട്ബോൾ ക്ലബ്ബാണ് എഫ്.സി. ബാഴ്സലോണ. സ്പാനിഷ് ലീഗായ ലാ ലിഗായിലാണ് എഫ്.സി. ബാഴ്സലോണ പ്രധാനമായും കളിക്കുന്നത്. ജോൺ ബാരോ ആയിരുന്നു ബാഴ്സലോണയുടെ ആദ്യ പരിശീലകൻ. കിരീടമൊന്നും നേടിക്കൊടുക്കാൻ കഴിയാത്തതിനാൽ നാലു മാസത്തിനു ശേഷം ബാരോയെ പിരിച്ചുവിട്ടു.
എഫ്.സി. ബാഴ്സലോണ പരിശീലകരിൽ ഏറ്റവും വിജയകരമായി കളിക്കാരെ പരിശീലിപ്പിച്ചത് യൊഹാൻ ക്രൈഫായിരുന്നു. യൊഹാൻ ക്രൈഫിന്റെ കീഴിൽ നാല് ലാ ലിഗാ കിരീടങ്ങൾ, ഒരു കോപ ഡെൽ റേ, മൂന്ന് സൂപ്പർ കോപ ഡി എസ്പാന, ഒരു യുവേഫ കപ്പ് വിന്നേഴ്സ് കപ്പ്, ഒരു യുവേഫ ചാമ്പ്യൻസ് ലീഗ് കിരീടം, ഒരു യുവേഫ സൂപ്പർ കപ്പ് എന്നിവ ബാഴ്സ നേടി. 8 വർഷത്തോളം യൊഹാൻ ക്രൈഫ് ബാഴ്സലോണയുടെ പരിശീലകനായിരുന്നു.
മറ്റൊരു പ്രധാന പരിശീലകനായിരുന്നു പെപ് ഗ്വാർഡിയോള. ഗ്വാർഡിയോളയുടെ ആദ്യ വർഷം തന്നെ ലാ ലിഗാ, കോപ ഡെൽ റേ, യുവേഫ ചാമ്പ്യൻസ് ലീഗ് കിരീടങ്ങൾ നേടി ഒരു ട്രെബിൾ സ്വന്തമാക്കുന്ന ആദ്യ സ്പാനിഷ് ക്ലബ്ബായി ബാഴ്സലോണ മാറി. പിന്നീട് സൂപ്പർ കോപ ഡി എസ്പാന, യുവേഫ സൂപ്പർ കപ്പ്, ഫിഫ ക്ലബ്ബ് വേൾഡ് കപ്പ് എന്നിവ കൂടി നേടി വർഷത്തിലെ ആറു കിരീടവും സ്വന്തമാക്കി ഒരു സെക്സ്റ്റപ്പിൾ നേടുന്ന ആദ്യ ക്ലബ്ബെന്ന ബഹുമതി ബാഴ്സ സ്വന്തമാക്കി.[1] 2014ൽ ചുമതലയേറ്റ ലൂയിസ് എൻറിക്വ് ആണ് നിലവിൽ ബാഴ്സയുടെ പരിശീലകൻ.