ജോസഫ് മെൻഗെളെ
From Wikipedia, the free encyclopedia
രണ്ടാം ലോകമഹായുദ്ധകാലത്തെ ജർമ്മൻ സുരക്ഷാസംഘടനയിലെ(എസ് എസ്)ഒരു ഉദ്യോഗസ്ഥനും ഓഷ്വിറ്റ്സ് തടങ്കൽപ്പാളയത്തിലെ ചികിത്സകനും ആയിരുന്നു ജോസഫ് മെൻഗെളെ (Josef Mengele) (16 മാർച്ച് 1911 - 7 ഫെബ്രുവരി 1979) . ഗ്യാസ് ചേമ്പറിലേക്കു ഇരകളെ തിരഞ്ഞെടുക്കുന്നതിനും തടവുകാരുടെ മേൽ മാരക പരീക്ഷണങ്ങൾ നടത്തുന്നതിനും ചുമതലപ്പെടുത്തപ്പെട്ട വൈദ്യസംഘത്തിലെ ഒരു കുപ്രസിദ്ധ അംഗമായിരുന്നു മെൻഗെളെ. പുതുതായെത്തുന്ന തടവുകാരെ ജോലി ചെയ്യാൻ ആരോഗ്യമുള്ളവരാണെങ്കിൽ ക്യാമ്പിലേക്ക് ചേർക്കുകയും അല്ലാത്തവരെ ഉടൻതന്നെ ഗ്യാസ് ചേമ്പറുകളിലിട്ടു കൊല്ലുകയുമാണ് അവർ ചെയ്തിരുന്നത്. റഷ്യൻ ചെമ്പടയുടെ വരവിനു തൊട്ടുമുമ്പേ 17 ജനുവരി 1945 -ന് മെൻഗെളെ ഓഷ്വിറ്റ്സിൽ നിന്നു പലായനം ചെയ്തു. യുദ്ധത്തിനുശേഷം ദക്ഷിണ അമേരിക്കയിലേക്ക് ഒളിച്ചോടുകയും തന്റെ ശിഷ്ടകാലം മുഴുവൻ പിടികൊടുക്കാതെ അവിടെ ജീവിക്കുകയും ചെയ്തു .
ജോസഫ് മെൻഗെളെ | |
---|---|
ജനന നാമം | ജോസഫ് മെൻഗെളെ |
Nickname | മരണത്തിന്റെ മാലാഖ (Angel of Death) (ജർമ്മൻ: Todesengel)[1] |
ജനനം | (1911-03-16)16 മാർച്ച് 1911 ഗുൺസ്ബർഗ്, ബാവേറിയ, ജർമനി |
മരണം | 7 ഫെബ്രുവരി 1979(1979-02-07) (പ്രായം 67) ബെർട്ടിയോഗ, സവോ പോളോ, ബ്രസീൽ |
ദേശീയത | Nazi Germany |
വിഭാഗം | ഷുറ്റ്സ്റ്റാഫൽ |
ജോലിക്കാലം | 1938–45 |
പദവി | SS-Hauptsturmführer (captain) |
Service number | |
പുരസ്കാരങ്ങൾ |
|
ഒപ്പ് |
മ്യൂണിക് സർവകലാശാലയിൽ നിന്നും നരവംശപഠനത്തിലും വൈദ്യപഠനത്തിലും ഡോക്ടറേറ്റ് നേടിയ മെൻഗെളെ ഒരു ഗവേഷകനായിട്ടാണ് തന്റെ ഔദ്യോഗികജീവിതം ആരംഭിക്കുന്നത്. 1937ൽ അദ്ദേഹം നാസി പാർട്ടിയിലും 1938ൽ എസ്. എസ് യിലും ചേർന്നു. രണ്ടാം ലോകമഹായുദ്ധകാലത്തു ബറ്റാലിയൻ മെഡിക്കൽ ഉദ്യോഗസ്ഥനായിട്ടാണ് തുടക്കത്തിൽ അദ്ദേഹത്തെ നിയമിച്ചതെങ്കിലും 1943 ന്റെ തുടക്കത്തിൽ തടങ്കൽപ്പാളയസേവനത്തിലേക്കു മാറ്റുകയും അവിടെ നിന്നു ഓഷ്വിറ്റ്സിലേക്കു നിയമിക്കുകയും ചെയ്തു. അവിടെ അദ്ദേഹം കണ്ടത് മനുഷ്യരിൽ ജനിതക ഗവേഷണങ്ങൾ നടത്താനുള്ള അവസരമാണ്. അദ്ദേഹത്തിന്റെ തുടർന്നുള്ള പരീക്ഷണങ്ങൾ - അവയിൽ മുഖ്യമായത് ഇരട്ടകളുടെ മുകളിലുള്ള പരീക്ഷണങ്ങളാണ് - ഇരകളുടെ ആരോഗ്യമോ സുരക്ഷയോ കണക്കിലെടുക്കാതെയുള്ളവയായിരുന്നു.
യുദ്ധാനന്തരം ചില മുൻ എസ് എസ് അംഗങ്ങളുടെ സഹായത്തോടെ 1949 ജൂലൈയിൽ മെൻഗെളെ അർജന്റീനയിലേക്ക് തിരിച്ചു. പശ്ചിമ ജർമ്മനി, ഇസ്രായേൽ തുടങ്ങിയ രാജ്യങ്ങളുടെയും സൈമൺ വെസെന്താൽ തുടങ്ങിയ നാസിവേട്ടക്കാരുടെയും നിരന്തരമായ അന്വേഷണശ്രമങ്ങളിൽ നിന്നും രക്ഷപെടാൻ തുടക്കത്തിൽ ബ്യുണസ് അയേഴ്സിന്റെ ചുറ്റിലും ജീവിച്ച ഇദ്ദേഹം 1959ൽ പരഗ്വെയിലേക്കും 1960ൽ ബ്രസീലിലേക്കും കടന്നു. 1979ൽ ബ്രസീൽ തീരത്തു നിന്നു നീന്തിക്കടക്കാൻ ശ്രമിക്കുന്നതിനിടെ മുങ്ങിമരിക്കുകയും ഒരു വ്യാജപ്പേരിൽ മറവുചെയ്യപ്പെടുകയുമാണുണ്ടായത്. 1985ൽ ഇദ്ദേഹത്തിന്റെ ഭൗതികാവശിഷ്ടങ്ങൾ കുഴിച്ചെടുക്കുകയും ഫോറൻസിക് പരിശോധന വഴി സംശയാതീതമായി തിരിച്ചറിയുകയും ചെയ്തു.