മാൽക്കം എക്സ്
From Wikipedia, the free encyclopedia
ഒരു ആഫ്രോ അമേരിക്കൻ സാമൂഹ്യപ്രവർത്തകനായിരുന്നു മാൽക്കം എക്സ് എന്നറിയപ്പെടുന്ന മാൽക്കം ലിറ്റിൽ May 19, 1925 – February 21, 1965). ഇദ്ദേഹം അൽഹാജ് മാലിക് അൽ ശഹ്ബാസ് (അറബി: الحاجّ مالك الشباز) എന്ന പേരിലും അറിയപ്പെടുന്നു. അമേരിക്കയിൽ വളരെയധികം സ്വാധീനം ചെലുത്തിയ വ്യക്തിത്വമായി അദ്ദേഹത്തെ വിലയിരുത്തുന്നവരുണ്ട്. കറുത്തവർക്കെതിരായ വിവേചനത്തെതിരെ സമരം നടത്തിയ മഹാൻ എന്ന് അനുയായികളാൽ വാഴ്ത്തപ്പെടുമ്പോൾ, എതിരാളികളാൽ വംശീയവാദി എന്നാരോപിക്കപ്പെടുന്നു.
തികച്ചും അനാഥനെപ്പോലെയായിരുന്നു അദ്ദേഹത്തിന്റെ ബാല്യകാലം, മാൽക്കമിന് ആറു വയസ്സുള്ളപ്പോൾ പിതാവ് കൊല്ലപ്പെട്ടു, മാൽക്കമിന്റെ പതിമൂന്നാമത്തെ വയസ്സിൽ മാതാവ് മനോരോഗം മൂലം ആശുപത്രിയിൽ ചികിത്സയിലായി. അനാഥാലായത്തിലായിരുന്നു മാൽക്കം പിന്നീട് വളർന്നത്. 1946 മോഷണക്കുറ്റത്തിനു ജയിൽവാസമനുഭവിക്കേണ്ടി വന്നു. തടവറയിൽ വച്ച് നാഷൻ ഓഫ് ഇസ്ലാമുമായി ബന്ധപ്പെട്ട അദ്ദേഹം, 1952 മുതൽ സംഘടനയുടെ നേതൃനിരയിലേക്ക് പ്രവേശിച്ചു. നാഷൻ ഓഫ് ഇസ്ലാമിന്റേത് സങ്കുചിതമായ വംശീയചിന്തയാണെന്ന് ആരോപിച്ച മാൽക്കം പിന്നീട് പ്രസ്ഥാനത്തോട് വിടപറഞ്ഞു.[1]
ആഫ്രിക്കൻ, അറബ് രാജ്യങ്ങളിലൂടെയുള്ള യാത്രയിൽ ഇസ്ലാമിലെ മതവിഭാഗമായ സുന്നിയിൽ ആകൃഷ്ടനായ മാൽക്കം പിന്നീട് ഇതിന്റെ പ്രചാരകനായി.[2] 1965 നാഷൻ ഓഫ് ഇസ്ലാം പ്രവർത്തകരുടെ വെടിയേറ്റ് മാൽക്കം അന്തരിച്ചു. അദ്ദേഹത്തിന്റെ മരണശേഷം ആണ് ആത്മകഥയായ ദ ഓട്ടോബയോഗ്രഫി ഓഫ് മാൽക്കം എക്സ്, പ്രസിദ്ധീകരിക്കപ്പെടുന്നത്. ഇരുപതാം നൂറ്റാണ്ടിൽ അമേരിക്കൻ സംസ്കാരത്തെ വളരെയധികം സ്വാധീനിച്ച ഒരു പുസ്തകമായി ഇത് വിലയിരുത്തപ്പെടുന്നു.[3]