വിനോദസഞ്ചാരം
കാഴ്ചകൾക്കും വിനോദത്തിനുമായി സ്വന്തം നാട് വിട്ട് നടത്തുന്ന യാത്ര / From Wikipedia, the free encyclopedia
പ്രധാനമായും വിനോദത്തിനും ആനന്ദത്തിനുമായി സ്വന്തം നാട് വിട്ട് നടത്തുന്ന യാത്രകളാണ് വിനോദസഞ്ചാരം അല്ലെങ്കിൽ ടൂറിസം (Tourism) എന്ന് അറിയപ്പെടുന്നത്. ഇത് ലോക വ്യാപകമായി നടക്കുന്ന ഒരു പ്രധാന വ്യവസായം കൂടിയാണ്. പല രാജ്യങ്ങൾക്കും ധാരാളമായി വിദേശ നാണ്യം നേടിത്തരുന്ന വമ്പൻ സാധ്യതകളുള്ള ഒരു വ്യവസായം കൂടിയാണ് വിനോദ സഞ്ചാരം അഥവാ ടൂറിസം. ടൂറിസത്തിനെ മാത്രം ആശ്രയിച്ചു മുന്നോട്ട് പോകുന്ന സമ്പത് വ്യവസ്ഥകളും രാജ്യങ്ങളും ലോകത്തുണ്ട്. ഇവ ലോകമെമ്പാടുമുള്ള സഞ്ചാരികളെ ധാരാളമായി ആകർഷിക്കുന്നു. വികസിത രാജ്യങ്ങളും ഇക്കാര്യത്തിൽ ഏറെ മുന്നിലാണ്. ഫ്രാൻസ്, സ്പെയിൻ, അമേരിക്കൻ ഐക്യനാടുകൾ, യുകെ, ജർമ്മനി, ഇറ്റലി, കാനഡ, ജപ്പാൻ, ദക്ഷിണ കൊറിയ, തായ്ലൻഡ്, ചൈന തുടങ്ങിയ രാജ്യങ്ങൾ അവയിൽ ചിലത് മാത്രം. ഇത് പല ജന വിഭാഗങ്ങളെയും അടുത്തറിയാനും ജീവിത രീതികളെയും സംസ്കാരങ്ങളെയും രാജ്യത്തിന്റെ വികസനത്തേയും പറ്റി മനസിലാക്കാനും കൂടുതൽ അറിവു നേടാനും ആധുനിക സൗകര്യങ്ങൾ ആസ്വദിക്കാനും ഉപയുക്തമാകുന്നു. കൂടാതെ വാണിജ്യാവശ്യത്തിനും മെഡിക്കൽ ആവശ്യത്തിനും സുഖചികിത്സയ്ക്കും ഒക്കെയായി നടത്തുന്ന ദൂരയാത്രകളും സാധാരണയായി വിനോദ സഞ്ചാരത്തിന്റെ പരിധിയിൽ ഉൾപ്പെടുത്താറുണ്ട്. ടൂറിസം, ആഭ്യന്തരമോ (യാത്രക്കാരന്റെ സ്വന്തം രാജ്യത്തിനുള്ളിൽ) അല്ലെങ്കിൽ അന്തർദ്ദേശീയമോ ആകാം.
വേൾഡ് ഇക്കണോമിക് ഫോറം പ്രസിദ്ധീകരിച്ച ട്രാവൽ & ടൂറിസം കോമ്പറ്റീറ്റീവ്നെസ് റിപ്പോർട്ടിൽ ഇന്ത്യ നിലവിൽ 34-ാം സ്ഥാനത്താണ്.[1] ഇന്ത്യയുടെ ജിഡിപിയിൽ യാത്രാ, ടൂറിസം മേഖലയുടെ മൊത്തം സംഭാവന 2017 ൽ 15.24 ലക്ഷം കോടി രൂപ (234.03 ബില്യൺ യുഎസ് ഡോളർ) ആയിരുന്നു.[1]
അന്താരാഷ്ട്ര ടൂറിസം മേഖലയിൽ അറിയപ്പെടുന്ന കേരളത്തിന്റെ ഒരു പ്രധാന വരുമാന മാർഗ്ഗമാണ് ടൂറിസം. 2018 ലെ കണക്കനുസരിച്ച് ആഭ്യന്തര-വിദേശ വിനോദസഞ്ചാരത്തിൽ നിന്ന് കേരളം പ്രതിവർഷം നേടുന്നത് 30,000 കോടിയിലേറെ രൂപയാണ്.[2] 2019 ൽ ആകെ 1.96 കോടി ആഭ്യന്തര വിദേശ വിനോദ സഞ്ചാരികൾ കേരളത്തിൽ എത്തിയിരുന്നു, 2018 ൽ ഇത് 1.67 കോടിയായിരുന്നു.[3] 2019 ലെ ആകെ വിനോദ സഞ്ചാരികളിൽ 1.83 കോടി ആഭ്യന്തര വിനോദസഞ്ചാരികൾ ആയിരുന്നു, ബാക്കി 11.89 ലക്ഷം പേർ വിദേശികൾ ആയിരുന്നു.[3] ടൂറിസത്തിൽ നിന്നുള്ള വരുമാനം 2019 ൽ 45010.69 കോടിയായി ഉയർന്നു.[3]