Galízia
quemunidade outónoma de Spanha / From Wikipedia, the free encyclopedia
La Galízia[1] (an galhego: Galicia ó Galiza) ye ua naçon recoincida anternacionalmente an 1933,[2][3] i stablecida cumo quemunidade outónoma de forma jurídica i admenistratiba, de acuordo cula custituiçon spanhola de 1978, cula catadorie de nacionalidade stórica, detreminada ne l sou statuto de outonomie, andrento de l Reino de Spanha i la Quemunidade Ouropeia.[4] L sou território queda ne l stremo noroeste de la Península Eibérica, a leste culas quemunidades outónomas de las Stúrias, i Castielha i Lhion, a oeste cul ouceano Atlántico, a norte cul mar Cantábrico, i inda al sul cun Pertual.
Ten cumo lhéngua própia l galhego, de ourige quemun cul pertués (dambas nacírun de la lhéngua mediabal coincida cumo galhego-pertués), sendo oufecial al lhado de l spanhol, que ye oufecial an toda Spanha.
La sue capital ye Santiago de Compostela que ten un statuto special,[5][6] andrento de la porbíncia de la Coruña. De acuordo cul censo de 2016, la Galízia ten 2 718 525 habitantes, cun ua densidade demográfica eilebada nas faxas antre Ferrol i Vigo. Na Galízia, hai siete núcleos ourbanos classeficados cumo cidades, que de acuordo culs critérios populacionales son ls seguintes: Vigo, Coruña, Ourense, Lugo, Santiago de Compostela, Pontevedra i Ferrol. Ten ua superfície de 29 574,4 km².[7]
D'acuordo cul censo de 2016, l cunceilho más poblado ye Vigo cun 292 817 habitantes, i l menos poblado ye Negueira de Muñiz cun 215 habitantes. L cunceilho mais ancho ye Fonsagrada cun ua superfície de 438,4 km², i l mais pequeinho ye Mondariz-Balneario cun 2,3 km². La Coruña ye l cunceilho cula meior densidade populacional cun 6449,32 hab./km², i Vilariño de Conso ye l cunceilho que ten la menor densidade populacional cun 2,92 hab./km².
L hino de la Galízia, Os Pinos, eilaborado por Eduardo Pondal, refre-se a la Galízia cumo la nacion de Breogán, un harói celta.[8]