Teofrasto
From Wikipedia, the free encyclopedia
Teofrasto (an griego: Θεόφραστος; Eresos, 372 a.C. — 287 a.C.) fui un filósofo de la Grécia Antiga, sucessor de Aristóteles na scuola peripatética. Era ouriundo de Eressos, an Lesbos, sou nome ouriginal era Tirtamo, mas quedou coincido pula alcunha de 'Teofrasto', que le fui dada por Aristóteles, segundo se diç, para andicar las culidades d'ourador.
Depuis de tener recebido ua purmeira antroduçon a la filosofie an Lesbos, de parte dun Leucipo ó Alcipo, fui para Atenas i cunseguiu antegrar-se cumo nembro de l círclo platónico. Depuis de la muorte de Platon, ligou-se la Aristóteles i probabelmente acumpanhou-lo la Stagira: l'amisade íntima de Teofrasto cun Calistenes, l'aluno i cumpanheiro de Alexandre Magno, la mençon ne l testamiento a ua quinta an Stagira i ls repetidos apuntamientos subre la cidade i ls museus na Stória de las Plantas son fatos que lieban l'esta cuncluson.
Aristóteles, ne l testamiento, nomeou-lo cumo tutor de ls filhos, legando-le la biblioteca i ls ouriginales de ls trabalhos i zeignando-lo cumo sucesor ne l Liceu, quando se mudou para Calcis. Eudemo de Rodes tamien alude l'esta situaçon i diç-se que Aristóxeno quedou ressentido cun esta decison de Aristóteles.