Verjuice
From Wikipedia, the free encyclopedia
Ing verjuice (ibat king amanung Frances o French a verjus "aluntyang katas"), metung yang katas a misnang kaslam a gagawan da kapamilatan ning pamanapsal kareng bubut a uvas. Neng kayi, katas ning limon o w:sorrel ing magagamit, o daragdagan dang yerba o dikut bang manaliwa ing kayang lasa. Kanitang Kalibudtang Panaun, marlas yang magagamit king pamaglutung Frances antimong sangkap kareng sarsa, antimong pampalasa, o king pamag deglaze.
Kanitang panaun a ita, iti ing gagamitan da, samantalang alak o metung a uri ning aslam ing gagamitan da reng talapaglutu ngening panaun tamu. Ngeni, uling dakal nang uring alak at aslam a maki pampalasa (flavored vinegar) ngeni, e ne makaing magagamit. Nanupata, magagamit ya pa murin kareng lutu dareng Frances at aliwang bansa king Europa, o kareng lutu ning Kalibudtang Aslagan (Middle East), at malyari yang salwan kareng tindaan a mamisaling sangkap a gourmet.
Keraklan, gagamitan deng pamapaslam kareng w:salad dressing ing verjuice, nung magpaynum lang alak kayabe ning ensalada o salad. Ing sangkan na niti, uling babye yang lasang maslam ing verjuice, dapot e ne "sasaulan" ing lasa ning alak, antimo alimbawa ing aslam o katas ning limon.