Myunix
From Wikipedia, the free encyclopedia
Myunix (s talimant : München) tga yat tɣrmt ɣ Lalman illan ɣ iyffus nns d tmaẓunt n tmazirt n Bafarya, tili ɣ 518 n umitru n tattuyt, ilkm wuṭṭun n imzdaɣn nns ɣ ussiṭn n 2011 kra n 1,3 n umlyun n umzdaɣ (ɣaylli gis igan tiɣrmt tis kṛaḍt n Lalman ɣ mad tuma d imzdaɣn) izgr tt yiɣzr n Iẓaṛ igan yat talat tasinant n wasif n Udanub. Tmgala d udrar n Walb s kra n ṣḍiṣt tmrawin n kilumitr ɣikann.
Tettyawssan is tga tamaẓunt tawrubbit n lbirra ukan ar gis ittili yan unmuggar wala imqqurn mi ismn "Uktubrfist" , d wanna ikkan tiɣrmt ad ur rad izri tikadralin nns dar illa yan waddur yattuyn da issktayn azmz abaṛuk d win tnkra, d ɣ yan yidis yaḍni ibrgmma nns lli ttyawbnanin ɣ tasut 12 d 13, tili gisn yat taẓilt idrus wanaw nns, ilin gis daɣ ma iggutn ɣ urtan igdudann i wanna iran ad ittbuwwah.