Karta ôd Helwiga
karta Ślōnska wydanŏ we 1561 roku / From Wikipedia, the free encyclopedia
Karta ôd Helwiga (ôrginalny tytuł łac. Tabula geographia sive mappa Silesiae[1]) to je piyrszŏ srogŏ samodzielnŏ karta Ślōnska[pozōr 1][2], wydanŏ we 1561 roku bez forszera i pedagoga majstra Martina Helwiga. Po 3 latach roboty karta ôstała wyrzeźbiōnŏ na 12 platach drukarskich. Rzeźbiōł ja H. Kron, a kartã wydrukowoł Johann Creutzig w Nysie[3]. Helwig stworzōł kartã podle włŏsnych ôbserwacyji, a tyż ôzprŏwek lokalnyj ludnoście[4].
Ślabikŏrzowe abecadło Tyn artikel je narychtowany we ślabikŏrzowym zŏpisie ślōnskij gŏdki. Coby sie przewiedzieć wiyncyj, wejzdrzij do artikla ô nim. |
Karta miała pŏrã wydań. Terŏźnie znōmy wydaniŏ z lŏt 1561, 1605, 1612, 1627, 1642, 1685, 1738, 1745, 1746, 1765, 1776, 1776, 1778, 1889 − cuzamyn 14. Dugi czas bōła to jedynŏ tyj zorty karta, kerŏ pokazowała Ślōnsk. Wiela razy bōła ôna publikowanŏ we atlasach, a stała sie mustrym dlŏ kart pochodnych. Ôrginalnŏ wersyjŏ karty niy zachowała sie do dzisiej. Powstoło pŏra kopije karty ôd Helwiga. Nojwŏżniyjszŏ z nich to kopijŏ, kerŏ Abraham Ortelius włōnczōł do swojigo dzieła Theatrum Orbis Terrarum (1570), inksze znane kopije sōm ôd Gerharda de Joda i Gerardusa Mercatora[3][5][6][7].
Karta ôd Helwiga je tyż interesujōncŏ z pōnktu widzyniŏ ôchrōny autōrskich praw. W czasie audiyncyje na Zōmku Praskim we 1561 roku Helwig żōndoł ôd cysŏrza Ferdynanda I Habsburga imprimatur (zwōla na drukowanie), a tyż strzodka zapewniajōncego kōnfiskatã niylegalnych kopiji i grziwny we wysokości dziesiyńciu grziwn złota. Grziwna ta ôstała niyskorzi rōwno roztajlowanŏ dlŏ autora a mōnarchy. Bōła to możebnie piyrszŏ we historyji kartografije ôchrōna autōrskich praw[5][8][9].