ლაგვანი
From Wikipedia, the free encyclopedia
ლაგვანი — მარქვალიშობური ფორმაშ, კონუსური (ოშა-გოშათ ბირტყა) ქვინჯიშ მაღვენი დიხაჭუბერიშ ჭკუდი, ინწრო კინჩხით დო დისკოშობური დუდით. ლაგვანი გჷმირინუაფუ ღვინიშ დადგჷმალო ვარდა ლაკარწამიშ ოჩუალარო. ლაგვანიშ გჷმორინაფა სპეციფიური რე - თის დიხას ინმანთხორანა დო ჰერმეტიულო ფორჷნა. საქორთუოს ლაგვანიშნერი ჭკუდი ორდოშიანი ბრონზეშ ხანშე რე ჩინებული, მორო მიარე თინეფიშ კონკრეტული დოშანაფა უჩინებუ რე. ლაგვანი მიარეთ რე გიშარჩქინელი ანტიკური ხანიშ ნოხორუეფს დო ოთხორუეფს.
საქორთუოშ კულტურაშ დო ძეგლეფიშ თხილუაშ მინისტრიშ ზოჯუათ, საქორთუოშ ედომუშამ ტერიტორიას უჯვეშაშ ბორჯიშე ასეშა გოფაჩილჷ, ღვინიშ დადგჷმალ დო ოჩუალარ დიხაჭაბუშ უნიკალურ ჭკუდის - ლაგვანს, ვამატერიალური კულტურული მონძალაშს ძეგლიშ სტატუსიქ მიაჩჷ[1]. თეჯგურა სტატუსი ლაგვანს, საქორთუოშ პრეზიდენტიშ 2012 წანაშ 8 ფურთუთაშ № 91 ზოჯუათ, „კულტურული მონძალაშ გეშა“ საქორთუოშ კანონიშ მა-18 ბირგულიშ მაართა პუნქტიშ მეჯინათ მიაჩჷ[2][3].
იუნესკოშ ვამატერიალური კულტურული მონძალაშ თხილუაშ თარობეფოშქაშე კომიტეტიშ მა-8 სესიას (ნ. ბაქო, 2-7 ქირსეთუთა, 2013) მიღეს გინოჭყვიდირუა საქორთუოშ წჷმორინაფილი ნომინაციაშ „ლაგვანიშ ღვინიშ დოდგჷმაშ უჯვეშაში ქორთული ტრადიციული მეთოდიშ“ ვამატერიალური კულტურული მონძალაშ წჷმმარინაფალობით ერკებულშა მიშაღალაშენი[4][5].