მექსიკაშ ჸუჯი
From Wikipedia, the free encyclopedia
მექსიკაშ ჸუჯი – (ესპ. Golfo de México, ინგლ. Gulf of Mexico, ფრანგ. Golfe de Mexique) - ატლანტიშ ოკიანეშ ნორთი, წყარიშ ღანჩო, ნამუთ აკოხურგელი რე ოორუე ამერიკაშ კონტინენტით დო კოკი კუბათ. უმოს კონკრეტულო, ოორუეშე, ოორუე-ბჟადალშე დო ოორუე-ბჟაეიოლშე აკოხურგელი რე ააშ-იშ, ობჟათეშე დო ობჟათე-ბჟადალშე - მექსიკაშ დო ობჟათე-ბჟაიოლშე კუბაშ წყარპიჯიშ ღოზით. მეჯინათ ჸუჯის ოვალიშ ფორმა უღუ. ატლანტიშ ოკიანეს მითმიარსხუ ფლორიდაშ საროტიშ მეშქაშობათ, ნამუთ კუბაშ დო ააშ-იშ შქას იდვალუაფუ, კარიბიშ ზუღას - იუკატანიშ საროტიშ მეშქაშობათ კუბაშ დო მექსიკაშ შქას. ოკიანეწკჷმა მერკე რსხუშ გეშა, ჸუჯის ეკინა-დოკინაშ დონე ძალამ მერკე რე. ჸუჯიშ ედომუშამი ფართობი 1. 6 მლნ კვადრატულ კილომეტერის აკმადგინანს. ჸუჯიშ გვერდშე უმოსი ძალამ დუდთხითხუ რე. ჸუჯიშ უტომბაში ჭურჭული – სიგსბიშ რღამილი 4. 384 მეტრა რე, ნამუშ სიგჷნძა 550 კილომეტრი რე. თე რღამილქ დოხოლაფირო 300 მილიონი წანაშ კინოხ წიმიქიმინჷ ზუღაშ ქვინჯიშ გეკინაშ გეშა.