交響曲
From Wikipedia, the free encyclopedia
交響曲(粵拼:gaau1 hoeng2 kuk1,英文:symphony,意大利文:sinfonia)係指作嚟預咗俾交響樂團演奏嘅樂曲,屬古典樂當中嘅大型樂曲。呢啲曲通常都會有幾段樂章咁長,當中最少一段樂章會係奏鳴曲噉嘅形式[1]。
例如貝多芬喺 1804 年至 1808 年間作嘅《命運交響曲》就係一首好出名嘅交響曲-《命運交響曲》成首嘢有 30 至 40 分鐘咁長,分做四大樂章,當中第一樂章傳統上係奏鳴曲形式;而且首曲係預咗俾一隊有雙簧管、小號同小提琴等多件樂器嘅樂團嚟合力演奏嘅[2]。
交響曲係古典樂上嘅重要一環:現代意義上嘅交響曲係喺 18 世紀尾嗰時成形嘅,而貝多芬响 19 世紀初嘅時候作咗多首風靡歐美樂壇嘅交響曲,確立咗交響曲喺古典樂上嘅地位[3];打後嘅古典樂壇仲出咗好多首出名嘅交響曲-例子有舒伯特嘅《第 8 號交響曲》同埋柴可夫斯基嘅《悲愴交響曲》呀噉。到咗廿一世紀初,交響曲具有龐大嘅影響力,係古典音樂會常見嘅部份[4],而且仲有影響到電子遊戲音樂等嘅大眾媒體[5]。