仙子
From Wikipedia, the free encyclopedia
- 廿世紀嘅仙子形象相當浪漫化:喺呢個時期嘅虛構故仔當中,仙子通常係細細隻,有好似蝴蝶噉嘅翼識飛,仲會施展魔法嚟幫人;例子可以睇吓迪士尼動畫片《小飛俠》[歐 1]裏面嘅小叮噹,或者《灰姑娘》相關媒體入面嘅神仙教母形象[1]。
- 中世紀嘅仙子同廿世紀嘅仙子相當唔同:喺中世紀嘅民間故事裏面,仙子有時近似邪靈咁滯;根據呢啲傳說,仙子往往望落似人但唔係人,唔一定有翼,但就算冇翼都可以識飛,好多時會用魔法拐帶細路或者捉大人返仙子之地做奴隸,甚至有故仔講仙子好似吸血鬼噉殺人同飲人血[4]。
- 喺最廣義上,「仙子」會畀人攞嚟泛指歐洲民間傳說入面有超自然力量嘅生物,例如愛爾蘭矮精靈喺呢種定義下會畀人當係仙子嘅一種[5]。
仙子相關嘅橋段具有相當嘅文化影響力:中世紀嘅歐洲人有好多關於仙子嘅迷信,例如佢哋信仙子怕凍鐵,所以會攞凍鐵造嘅物品嚟防仙子[6];喺中世紀後,仙子都仲有出現喺文化產物裏面,例如莎翁名作《仲夏夜之夢》就有講到仙子[7];到咗廿一世紀初,好少可會有人信仙子嘅存在,但仙子依然係成日出現喺奇幻故仔入面,當中小叮噹同神仙教母都係家傳戶曉嘅虛構角色[2]。