平台遊戲
From Wikipedia, the free encyclopedia
平台遊戲(粵讀:ping4 toi4 jau4 hei3;英文:platform game / platformer),又譯跳台遊戲,係動作電子遊戲一種,定義上最重要嘅特徵係會要求玩家控制住玩家角色,用各種方法(跳同爬呀噉)喺遊戲虛擬世界嘅平台[歐 1]上面移動同穿過各種障礙物,啲平台上好多時唔平坦而且佈滿敵人同各種機關,令到隻遊戲有咁上下難度[1][2]。
平台遊戲可以話係最早期嘅電子遊戲類型之一:一般認為,平台遊戲嘅元祖係喺 1981 年由任天堂發行嘅《大金剛》-呢隻遊戲打前嘅遊戲都有用到平台,但《大金剛》係頭一隻畀玩家控制主角跳嘅,而打後嘅平台遊戲都一路有跳嘅機制,呢點被指對平台遊戲嘅設計影響深遠[3];呢隻遊戲當中嗰兩個核心角色-瑪利奧同大金剛-後嚟都各自成為電子遊戲界嘅經典角色,出咗多部對遊戲設計影響重大嘅作品[4]。
到咗廿一世紀初,平台遊戲依然係其中一種最有影響力嘅電子遊戲類型:1980 年代至 1990 年代係平台遊戲嘅頂峰,據估計喺 1998 年平台遊戲喺電子遊戲市場有成 15% 咁多嘅市場佔有率;後嚟因為射擊遊戲等同樣大受歡迎嘅遊戲類型崛起,平台遊戲嘅市場佔有率跌咗[5];但呢隻遊戲類型依然持續出到名作,例如 Wii 嘅《超級瑪利奧銀河》就畀好多人譽為電子遊戲史上最出色嘅作品之一,賣咗超過 1,280 萬份咁多[6]。