管理學
From Wikipedia, the free encyclopedia
管理學(粵拼:gun2 lei5 hok6;英文:management)係指探討一個組織要點樣管嘅一門商學領域:「一個組織」可以係一間企業、一個非牟利機構或者一個慈善團體都得;管理學旨在考慮點樣安排一個組織嘅各種資源,包括財力、物力同人力等,務求令到個組織成功達到目的嘅機會率有咁大得咁大[2][3],而途中要諗到應變管理(幫個組織改變自身嚟適應外界形勢)、風險管理(測量同評估風險)同埋績效管理(監督個組織嘅人員同工作團隊)等嘅多個課題[4]。一般認為,管理學係商學最基礎最重要嘅學問之一[3]。
廿一世紀嘅學術界相當重視管理學:社會科學會將管理學當成一門學術領域噉嚟研究,並且嘗試研究例如一個組織嘅效率同佢安排佢啲資源嘅方式之間有咩啦掕,有學術期刊定時定候出版呢啲研究論文[5]。為求令管理學對佢所研究嘅現象有更深嘅了解,仲有管理學方面嘅學者開始咗運用神經科學同人工智能呢啲「硬」科學(指精確嘅科學)領域嘅知識嚟解釋同研究管理學上撞到嘅問題[6][7]。
管理學本質上係個應用領域[8],所以除咗學術價值,管理學亦都重視實務性質嘅課題。管理學上嘅討論唔淨只要求對現象嘅理論性質嘅了解,仲會講求點樣提高管理嘅效率。好似係有關領導能力嘅研究噉:領導能力包含一個人引領同激勵身邊嘅人,而管理學上一般認為,領導才能對管理者嚟講係重要嘅能力;管理學研究會用科學方法探討成功嘅領袖有乜特徵,同時又會按呢啲研究嘅結果,諗吓管理人才嘅訓練過程要作出乜嘢變革,先可以提高經過呢啲訓練嘅人嘅領導能力-理論同實踐都受到重視[9][10]。