芭蕾舞詞彙表
From Wikipedia, the free encyclopedia
以下係芭蕾舞(法文:ballet;法文讀音:[ba.lɛ])上比較常用嘅詞彙嘅一覽表,包括咗跳芭蕾舞嗰陣時用嘅技巧同用具,以至係芭蕾舞相關人員用嘅稱謂呀噉。呢個詞彙表以英國嘅皇家舞蹈學院(RAD)嗰套做中心,噉係因為大中華地區——包括粵港澳地區在內——喺芭蕾舞制度上不溜都係跟開英國嗰套標準嘅[1][2]。
芭蕾舞詞彙當中,有好多都係嚟自英文以外嘅歐洲語言嘅,尤其係法文:今日嘅芭蕾舞技巧有好多都源自 16 至 17 世紀嘅法國,當時芭蕾舞啱啱成咗形冇幾耐,技術仲未成熟,但就引起咗當代法國藝術家嘅興趣,於是當時嘅法國藝術家就著力幫手研究芭蕾舞技巧,用法文字詞幫啲技巧改名,最後令芭蕾舞成為一種廣受人認同嘅藝術;因為呢段歷史,芭蕾舞詞彙有好多都係由法文直接借過去英文嗰度嘅字,而芭蕾舞老師等嘅人員讀呢啲字嗰陣,多數都會跟返法文嗰啲讀音。除咗法文之外,英文嘅芭蕾舞詞彙當中都有一部份係源自意大利文(意大利係芭蕾舞發源地)或者俄羅斯文(俄羅斯係芭蕾舞大勢力,出咗多齣舉世知名嘅舞劇)嘅[3]。