釹攝石又嗌釹鐵硼攝石,係由釹、鐵、硼(Nd2Fe14B)形成嘅四方晶系晶體,由住友特殊金屬嘅佐川眞人喺1982年發現。爾種攝石嘅磁能積(BHmax)大過釤鈷攝石,係當時全世界磁能積最大嘅物質[1]。後來,住友特殊金屬成功發展粉末冶金法,通用汽車成功發展旋噴熔煉法,可以造到釹鐵硼攝石[2]。爾種攝石係家下磁性最強嘅永久攝石,亦係最常用嘅稀土攝石。釹鐵硼攝石廣泛應用喺電子產品,例如硬碟、手機、耳機同埋用電芯供電嘅工具等。
爲咗唔腐蝕,要喺永久攝石材料表面做保護處理,例如用金、鎳、鋅、錫做電鍍,同埋喺表面噴環氧樹脂等[3]。