香港理工大學衝突
2019年香港反修例运动期间嘅警民冲突 / From Wikipedia, the free encyclopedia
香港理工大學衝突,參與者叫理大保衛戰,係2019年11月反逃犯條例修訂運動嘅黎明行動引發嘅衝突,因為紅磡嘅「三罷」示威者闖入香港理工大學,佔領校園為據點堵塞校園外圍嘅交通(包括紅磡海底隧道收費廣場、漆咸道南同埋東鐵綫紅磡站),期間校方一再要求示威者離開校園,警方亦同示威者持續對峙。不過衝突未有好似同期香港中文大學衝突噉和平落幕,警方自11月17號開始全面包圍理大校園,將離開校園嘅人(記者除外)一律拘捕(之後警方畀18歲以下嘅人可以登記之後離開,但會保留拘捕權利)。有被困嘅示威者嘗試用唔同方法突破警方封鎖離開,但大多都係失敗。喺校方多次要求警方盡快解封校園後,警方喺11月28號入校園蒐證同清理危險品,期間發現唔到有示威者,11月29號正式解封校園交還校方。事後根據警方登記及被捕人士身份發現絕大多數示威者都唔係理工大學嘅學生。期間,被捕人數有1377人,俾警察登記嘅未成年抗爭者人數有318人。另外,當中只得46人係理大學生,2人係理大教職員。
期間紅磡海底隧道除咗被堵塞,收費亭同埋行政大樓都受到破壞,隧道去到11月27號上晝至開得返。