儒家
From Wikipedia, the free encyclopedia
儒家(粵拼:jyu4 gaa1)係一種哲學思想體系,由孔子提出,亦有以呢種哲學做類宗敎,叫儒敎或者孔敎。套哲學涉及政治、道德、社會,喺東亞各國好有影響力。
儒家初頭只係屬諸子百家之一,喺秦代大受迫害,但係由漢代起就得到朝廷獨尊,成為官學同國教,掌握文化教育同入仕之途,奠定儒家喺中國歷史文化嘅地位。喺兩晉南北朝同唐朝,儒家同佛教、道教合稱「三教」。儒學試過一度冇咗喺哲理思想領域嘅領導地位,後嚟經宋儒重新闡釋,形成理學,得以重振聲勢,倫理思想滲透到中國社會各個層面,並且流傳到朝鮮、日本、越南、琉球等地,大受尊崇,成為咗東亞一大學術思想體系。