講波
From Wikipedia, the free encyclopedia
講波係球賽評述嘅通俗叫法,而喺香港,一般嘅普羅大眾都鍾意叫球評人做「講波佬」。
負責講波嘅人係要將一場球賽嘅過程,盡可能完整咁向喺收音機或者電視機前面收聽收睇緊嘅聽眾/觀眾作出介紹及分析,包括嗰種球類嘅玩法、賽制,嗰場賽事所參與球員/球隊嘅背景,球隊出場嘅陣容,戰術嘅運用,球賽嘅進行……等。
所以講波普遍被視為一種專業,因為第一,佢哋當然要全面認識嗰種球類運動,其次手頭上嘅資料要充足,分析球賽嘅時候亦唔可有太多主觀嘅個人意見,要對球賽客觀咁批評,咁啲觀眾聽眾先可以喺中立嘅情況下欣賞球賽;因此要成為一個評述某種球類比賽嘅專業講波佬絕對要下一番功夫,可以話係屬於專業人士嘅範疇。