中世紀後英文
From Wikipedia, the free encyclopedia
中世紀後英文(粵拼:zung1 sai3 gei2 hau6 jing1 man2;英文:Early Modern English),又叫做近代英文,係指大致 15 世紀(帝舵時期)至 17 世紀中之間嘅英文[1]。最能夠代表呢個時段嘅英文,就係《聖經》嘅英王欽定本同埋莎士比亞嘅文學作品。
喺呢段時期,英文出現咗元音大推移。同時,由於歐洲四圍都掀起咗文藝復興嘅風潮,歐洲人廣泛咁重新發掘基督教化前嘅文化遺產,咁英文就自然引入咗唔少嚟自拉丁文同希臘文嘅借詞。除此之外,對英文影響深遠嘅劇作家莎士比亞都係呢個時代嘅人[2][3]。
近代英文無論係口語定書寫,都出現咗顯著嘅變化。到 15 世紀開始,英文出現咗元音大推移[e 1],英文啲元音嘅讀音開始變,令到成個英文好多嘅字都慢慢改咗讀音。喺書寫方面,英格蘭人同時亦開始將英文嘅大階同細階定返好啲規則,逐漸咁穩定落嚟[4]。除此之外,因為當時開始普及嘅印刷機通常都冇淨係得英文先有嘅字母,所以有啲字嘅串法亦都改咗。到 1604 年,史上第一本英文字典《字母順序》[e 2]正式出版,引致英文書寫嘅串法開始標準化。到莎士比亞在生嘅年代,英文已經完全喺近代英文嘅階段[5]。