Gerald Ford
From Wikipedia, the free encyclopedia
Gerald Rudolph Ford, Jr., nacíu col nome de Leslie Lynch King, Jr. (14 de xunetu de 1913, Omaha – 26 d'avientu de 2006, Rancho Mirage (es) ), foi'l trentenu octavu presidente de los Estaos Xuníos, qu'exerció'l cargu dende'l 9 d'agostu de 1974 hasta'l 20 de xineru de 1977, tres l'arrenunciu de Richard Nixon pol escándalu Watergate.
Enantes desempeñara'l cargu de vicepresidente del país, mientres ocho meses, tres l'arrenunciu de Spiro Agnew. Foi'l primeru en ser escoyíu según el procedimientu establecíu na Vigésimoquinta Enmienda a la Constitución d'Estaos Xuníos y al asumir la presidencia, convirtióse tamién na primera y hasta agora única persona qu'exerció tanto la vicepresidencia como la presidencia d'Estaos Xuníos, ensin ser escoyida pol Colexu Eleutoral. Foi miembru del Partíu Republicanu.
Mientres la so presidencia remató la Guerra de Vietnam y robláronse los Alcuerdos de Helsinki. Tocantes a política interna, Ford atopóse ante'l peor panorama económicu dende la Gran Depresión de 1929: mientres los sos años na presidencia'l país entró en recesión y hubo una creciente inflación.[12] Una de les sos decisiones más polémiques foi dar el indultu al presidente Richard Nixon, implicáu nel llamáu Escándalu Watergate. En 1976 Ford ganaría a Ronald Reagan na nominación del Partíu Republicanu, pero perdería per un escasu marxe ante'l demócrata Jimmy Carter nes eleiciones presidenciales d'esi añu.
Depués de los sos años na presidencia Ford siguió participando nel Partíu Republicanu. Dempués de sufrir problemes de salú morrió na so casa'l 26 d'avientu de 2006, a los 93 años. El so mandatu presidencial, que duró 895 díes, ye'l más curtiu d'ente los presidentes de los Estaos Xuníos que nun morrieron mientres exercíen el cargu.