Titanic
From Wikipedia, the free encyclopedia
Lo RMS[1] Titanic foguèt un paquebòt transatlantic britanic de la White Star Line bastit a l'iniciativa de Joseph Bruce Ismay en 1907. Foguèt concebut pels arquitèctes Alexander Montgomery Carlisle e Thomas Andrews dels talhièrs navals Harland & Wolff. Sa construccion comencèt en 1909 a Belfast e s'acabèt en 1912. Es a auesta epòca lo paquabòt mai luxuós e mai grand jamai bastit. Aparteniá a la classa Olympic amb sas doas naus sòrres, l'Olympic e lo Britannic. La còca del Titanic èra dotada de setze compartiments estancs destinat a aparar la nau en cas d'intrada d'aiga o d'avarias importantas, li donant atal la reputacion de paquebòt « insubmersible » e mena, encara ara, los medias contemporanèus a lo presentar coma una de las naus mai seguras.
Pendent son vitage inaugural, de Southampton a Nòva York via Cherbourg e Cobh (Queenstown a l'epòca), naufraguèt tustant amb sa còca davant un icebèrg a tribòrd, lo 14 d'abril de 1912 a 23 h 40 (ora locala). S'enfonzèt lo 15 d'abril de 1912 a 2 h 20 al larg de Tèrra Nòva. Entre 1 490 e 1 520 personas desapareguèron, çò que fa d'aqueste eveniment una de las catastròfas maritimas màger arribadas en temps de patz e la mai granda per l'epòca. Lo drama mòstrèt las decas de las naus de l'epòca al subjècte del nombre limitat de barcas de salvament e las mancas dins las proceduras d'evacuacions d'emergéncia. Lo poderós emetor TSF permetèt de cridar d'ajuda.
L'epava del Titanic foguèt localizada lo 1èr de setembre de 1985 pel professor Robert Ballard. Gesís a 3 843 mètres de prigondor a 650 quilomètres al sud èst de Tèrra Nòva. L'istòria del paquebòt marquèt las memòrias, provòquèt la redaccion de fòrça obratges (istorics e de ficcion) e la realizacion de longs metratges entre losquals lo film del meteis nom Titanic de James Cameron, sortit en 1997.