పురాతన మానవులు
From Wikipedia, the free encyclopedia
3,15,000 సంవత్సరాలకు ముందు, ఆధునిక మానవుల కంటే ముందు ఉద్భవించిన హోమో రకాలన్నిటినీ కలిపి పురాతన మానవులని అంటారు. హోమో నియాండర్తాలెన్సిస్ (4,30,000 + –25,000 సం.),[1] డెనిసోవాన్స్, హోమో రొడేసియెన్సిస్ (3,00,000–1,25,0000 సం.), హోమో హైడెల్బెర్గెన్సిస్ (6,00,000-2,00,000 సం.), హోమో యాంటెసెస్సర్ లను సాధారణంగా పురాతన మానవులని భావిస్తారు.
ఈ పరిభాషపై సార్వత్రిక ఏకాభిప్రాయం లేదు. "పురాతన మానవుల" రకాలను కొంతమంది రచయితలు హోమో సేపియన్స్ లేదా హోమో ఎరెక్టస్ అనే పేరు కింద చేర్చారు.
పురాతన మానవుల మెదడు పరిమాణం సగటున 1,200 నుండి 1,400 క్యూబిక్ సెంటీమీటర్ల వరకూ ఉంటుంది. ఇది ఆధునిక మానవుల మెదడు పరిమాణంతో అటూ ఇటూగా సరిపోలుతుంది. మందపాటి పుర్రె, ఎత్తైన కనుబొమల గట్లూ ఉండడం, స్ఫుటమైన చుబుకం లేకపోవడం వంటి లక్షణాల కారణంగా పురాతన మానవులు ఆధునిక మానవుల కంటే విభిన్నంగా ఉంటారు.[2][3]
ఆధునిక మానవులు 3,00,000-2,70,000 సంవత్సరాల క్రితం ఆఫ్రికాలో తొలుత ఉద్భవించారు. 70,000 సంవత్సరాల క్రితం (టోబా విపత్తు సిద్ధాంతం చూడండి) క్రమంగా "పురాతన" మానవుల స్థానాన్ని ఆక్రమించారు. ఆధునికేతర హోమో రకాలు 30,000 సంవత్సరాల క్రితం వరకు ఉండేవారనేది ఖాయం. బహుశా 12,000 సంవత్సరాల క్రితం వరకు కూడా ఉండి ఉండవచ్చు. ఈ రకాల మానవుల్లో ఎవర్ని పురాతన మానవులుగా భావించాలి, అసలు ఎవర్నైనా భావించాలా లేదా అనేది వివిధ రచయితలు దాన్ని నిర్వచించిన విధాన్ని బట్టి మారుతూ ఉంది. ఏదేమైనా, ఇటీవలి జన్యు అధ్యయనాల ప్రకారం, ఆధునిక మానవులు పురాతన మానవులలోని "కనీసం రెండు సమూహాలతో" – నియాండర్తల్, డెనిసోవాన్స్ తో- లైంగిక సంపర్కం జరిపి ఉండవచ్చు.[4]
మరొక సమూహం - చైనాలోని రెడ్ డీర్ కేవ్ ప్రజలు - 11,500 సంవత్సరాల క్రితం వరకూ కూడా ఉండి ఉండవచ్చు.[5] లండన్లోని నేచురల్ హిస్టరీ మ్యూజియంకు చెందిన క్రిస్ స్ట్రింగర్, ఈ వ్యక్తులు డెనిసోవన్లు, ఆధునిక మానవుల మధ్య సంపర్కం ఫలితంగా ఉద్భవించి ఉండవచ్చని సూచించాడు.[6] ఆధునిక మానవ జనాభాలలో మామూలుగా ఉండే వైవిధ్యాలలోని భాగమే ఈ ప్రత్యేక లక్షణాలని చెబుతూ, కొందరు శాస్త్రవేత్తలు ఈ వాదనను సందేహించారు.[7]