ISO 4217
From Wikipedia, the free encyclopedia
ISO 4217 (ИСО 4217) — სტანდარტიზაციაშ ოერეფოშქაშე ორგანიზაციაშ (ISO) სტანდარტი, ნამუსჷთ მიშმუღჷ სუმასოამ ანბანურ დო სუმშანამ ცირფულ ვალუტაშ კოდეფი. თინეფიშ გჷმორინაფაშ თარი სფერო რე — დოკუმენტეფი დო გინაფეფი, ნამუეფჷთ ორხველჷ ოერეფოშქაშე გარიგეფს, თაშნეშე ირნერი კომერციული ვარ-და ობანკე მოღალას, სოდე ღანკგიოწონჷ რე გჷმიხანტას ვალუტაშ ჯოხო კოდირაფილი ვარ-და კუნტა ფორმათ დო თეწკჷმა ართო თიში გარკვიულო იდენტიფიცირაფაქ შილებუასჷნ, თიშ გეშა, ნამჷ-და შხვადოშხვა ვალუტას შილებე ართნერი ჯოხო უღჷდასჷნ (ამერიკული დოლარი, კანადური დოლარი, ავსტრალიური დოლარი დო შხვა)[1][2].
სტანდარტიშ მოქიმინჯე რედაქციაშ ოფიციალური ჯოხო:
- ინგლისურ ნინაშა — ISO 4217:2008. Codes for the representation of currencies and funds[3];
- ფრანგულ ნინაშა — ISO 4217:2008. Codes pour la représentation des monnaies et types de fonds[4];
- რუსულ ნინაშა — ISO 4217:2008. Коды для представления валют и фондов[5].
სტანდარტიზაციაშ ოერეფოშქაშე ორგანიზაციაქ შჷმუშჷ დოხოლაფირო 18 500 სტანდარტი; ISO 4217 მიშურს 8 არძაშე უმოსო მოთხირი სტანდარტეფიშ ერკებულშა[6] დო კინ მუ სტანდარტიზაციაშ ოერეფოშქაშე ორგანიზაციას (ISO) არძაშე უმოსო წჷმოძნელეფიშ სუმელაშა მიშურს[7].
ორიგინალს სტანდარტი იბჷინაფჷ ინგლისურ დო ფრანგულ ნინეფშა[2]. სტანდარტიზაციაშ ოერეფოშქაშე ორგანიზაციაშით ავტორიზაფილი ოფიციალური ნათანგა ქორთულ დო მოსოფელიშ შხვა ნინეფშა ვერსულებჷ.
ISO 4217 სტანდარტიზაციაშ ოერეფოშქაშე ორგანიზაციიაშ მაკათური ქიანეფშო რეკომენდაცია რე. თიშ ოსხირშა იხაზირებჷ ერუანული სტანდარტეფი — სამანგათ, ვალუტაშ ოართერუსული კლასიფიკატორი[8] ვარ-და ვალუტაშ უკრაინული კლასიფიკატორი (უკრ. Класифікація валют)[9]. კანკალე შვანს უშქაშეთ იხვარებჷ ISO 4217 — სამანგათ, ევროპაშ რსხუშ ფარგილს[10].
ISO-შ ოფიციალური პოლიტიკაშ ომანგეთ, ირნერი ღანკიშო ISO 4217-იშ კოდეფიშ გჷმორინაფაშ ძივთი (სამანგათ, პროგრამული უნარღელჸოფაშ შემუშებაშო ვარ-და ობანკე სფეროს გჷნოგაფაშ იდენტიფიკაციაშო) ვაშიღალუაფჷ[7].