構圖
From Wikipedia, the free encyclopedia
構圖(粵拼:gau3 tou4,又有讀「粵拼:kau3 tou4」;英文:visual composition / composition)係視覺藝術上嘅一個概念。一幅視藝作品嘅構圖指嗰幅作品當中唔同物件嘅位置-包括每件物件相對個框嘅位置以及彼此之間嘅相對位置:一幅視藝作品-例如係一幅畫或者一張相-當中會有若干件藝術元素(element of art);藝術元素包括咗線、形狀同色水等;每件元素會喺幅作品上有個位置以及相對於第啲元素嘅位置。視藝上對構圖嘅思考就旨在諗「藝術元素嘅位置要點安排,先可以賦予幅作品結構同埋表達藝術家嘅意圖,造出令人覺得賞心悅目嘅作品」[1][2]。
以荷蘭畫家維梅爾(Johannes Vermeer)嘅其中一幅出名作品《畫畫嘅藝術》(The Art of Painting;附圖)為例,《畫畫嘅藝術》個構圖簡單講如下:圖中有「塊掛毯」、「個畫家」同「個模特兒」等嘅多件物件,當中個畫家線條上大致垂直(線),佔嘅空間大致成四方形(形狀),形態係一個坐喺度嘅人(形態),置於塊掛毯之後同個模特兒之前(相對第啲元素嘅位置;塊掛毯起咗「將觀眾視線引入個畫家身處空間」嘅作用),離右邊界距離大約係成幅畫闊度嘅 1/3(相對於個框嘅位置)[3]。
喺視覺藝術上,構圖扮演咗多種重要嘅作用,包括令幅圖變得更和諧同幫觀眾了解個場景等等。物件彼此之間嘅關係、相似嘅規律之間點樣分群、同物件點樣同背景分離等如果做得好會令成幅作品望落更加和諧,仲可以巧妙噉引導觀眾嘅眼光,令藝術家能夠控制觀眾點樣體驗佢幅作品(例如頭先提到,《畫畫嘅藝術》當中塊掛毯將觀眾眼光引入個畫家身處嘅空間)[1][2]。事實係,認知心理學(cognitive psychology;研究認知嘅心理學子領域)上對視知覺嘅研究表明咗,一幅圖像嘅構圖會影響觀眾嘅眼珠點郁動以至觀眾有幾鍾意幅作品[4][5]。